李辰安 - 可憐天下父母心｜辰來之筆

更新時間：06:10 2022-03-15 HKT
發佈時間：03:00 2022-03-15 HKT

自從重大疫情之下，元宇宙通訊玩得太多，朋友相聚好難再虛擬實景，不如一個人靜靜地同自己講故事消閒。

有乜嘢故事好講？由於家中物資供應不是太豐富，連車仔茶包都所餘無幾，於是黃昏日落、外面濕淋淋之情景下，飲杯溫暖水算啦。好多朋友勸我快啲寫網絡小說，事關香港近日除了民生食品短缺之外，精神食糧都渴市。不過，我心諗︰「乜大家唔係煲劇咩，全世界嘅劇都可以手機、平板收看，你話仲有幾多人睇書？」

好啦，開個網上會議同班朋友吹下水先。「安仔，如果依家有位好似科幻小說大師倪匡之人物出現，你話幾好呢，聽講佢一日可以寫幾千字，話咁快一個星期就可以出一本書，唔似你話寫話寫，成年都未見個前言，如果平均一個星期有一本好似《衛斯理》咁好睇嘅書出版，香港人就算屈喺屋企都無咁悶。」話口未完，大師兄馬上接着銀行偉發言︰「嗱，香港今時今日就體現緊乜嘢係中國速度，國家辦事只一天，特區要花好幾年。但係倪匡大師創下之倪匡速度，就可以幫我哋攞返啲Face。」

乜嘢係倪匡速度？上網搜一搜，嘩，你唔係嚇我？「偉哥，大師唔止一日寫幾千字，你噏多十次八次啦。」網上話，倪匡寫作速度最高紀錄是一小時四千五百字，最慢是一小時二千五百字。張翁出現在畫面，佢話倪翁可能係外星人，當年有好多關於呢方面之傳聞，所以大家唔好將我同倪匡相提並論，太高要求了。「大家好，今日吹水吹到去香港科幻大師，真係好有興趣，我搵到其他資料可以同大家分享。」

倪匡曾經謙稱自己是自有人類以來，寫得中文字最多的人，不過，文壇中人話倪匡實在太過謙虛，因為唔止係中文，乜文都無人寫得夠佢多，亦無人可以寫得夠佢快。

「倪匡可以一天寫幾萬字，佢寫稿唔似寫稿，更似是一台人工智能機械人，就可以打印一樣，嗶嗶聲輸出文書檔案咁，話說倪翁右手疾筆如飛，左手如拉布一般把稿紙拉過去，一張接一張的寫，諗都唔使諗，就可以交稿。」老實講，一星期出一本小說唔算快，你想要快啲都可以。

「辰哥，自從內地出咗一批網絡小說寫手，倪匡紀錄可能被打破，因為知名的幾位網紅作家，一本書閒閒地幾百萬字，好多寫到入廠。」長江後浪推前浪，都無乜出奇，何況呢一代人係用鍵盤寫小說，打字快定係用支筆快，我都好想知，總言之，返番去正題，如果喺依家環境，有多啲好似《衛斯理》之系列作品，世界多美好。

香港其實有好多本地題材十分有趣，好似講關於流行大瘟疫，沙田區、西貢區都曾經有過民間傳奇，話某某朝廷大將軍原來有成身正氣，當年某日香港地方發了瘟，搞來搞去都搞唔掂，大將軍一到，拜下神就驅走瘟疫，你話神奇唔神奇？

「安仔，你唔係講香港民間傳奇咁噃，你直情好似做緊《東張西望》，乜嘢朝廷大將軍，你唔好話係欽差大臣落咗嚟香港，正在主持大局，依家幫香港人抗疫。你想借題發揮，定係借古諷今？」咦，大師兄，你諗多咗，之不過，故事如有雷同，實屬巧合啫。話時話，呢個瘟疫大流行可以玩穿越劇。「安仔，你都要小心考慮一下，欽差大臣嗰角色好敏感，尤其依家時勢，你不如都係度過第二條橋好過。」

好，有乜問題，大把香港題材可以二次創作，例如大導演楚原年輕時代成名作《可憐天下父母心》（見圖，黑白圖片）都可以寫個時空版。「世侄，呢套戲我細細個同屋企人睇，真係好賺人熱淚，之不過，你搞文藝倫理大悲劇，好似好離題。」張翁，唔一定要寫衛斯理科幻小說，最緊要係應景。「辰哥，你有幾應景呀，上世紀六十年代之場景，你令我哋想到啲乜呢？」

大家飲杯水先啦，不如開包薯片食，Relax。「我想話你知，偉哥，當年楚原套代表作叫好叫座，成為當時香港現象，大家都體會得出電影中之香港人徬徨之生活，於是有一句順口溜︰家家有白燕，成街張活游，呢句嘢相隔六十幾年之後，你話應景唔應景？」

白燕、張活游係劇中之男女主角，生活逼人，遭遇苦過苦瓜乾，你想知佢哋有幾慘，上網可重溫。