李辰安 - 可怜天下父母心｜辰来之笔

更新时间：06:10 2022-03-15 HKT
发布时间：03:00 2022-03-15 HKT

自从重大疫情之下，元宇宙通讯玩得太多，朋友相聚好难再虚拟实景，不如一个人静静地同自己讲故事消闲。

有乜嘢故事好讲？由于家中物资供应不是太丰富，连车仔茶包都所余无几，于是黄昏日落、外面湿淋淋之情景下，饮杯温暖水算啦。好多朋友劝我快啲写网络小说，事关香港近日除了民生食品短缺之外，精神食粮都渴市。不过，我心谂︰「乜大家唔系煲剧咩，全世界嘅剧都可以手机、平板收看，你话仲有几多人睇书？」

好啦，开个网上会议同班朋友吹下水先。「安仔，如果依家有位好似科幻小说大师倪匡之人物出现，你话几好呢，听讲佢一日可以写几千字，话咁快一个星期就可以出一本书，唔似你话写话写，成年都未见个前言，如果平均一个星期有一本好似《卫斯理》咁好睇嘅书出版，香港人就算屈喺屋企都无咁闷。」话口未完，大师兄马上接着银行伟发言︰「嗱，香港今时今日就体现紧乜嘢系中国速度，国家办事只一天，特区要花好几年。但系倪匡大师创下之倪匡速度，就可以帮我哋攞返啲Face。」

乜嘢系倪匡速度？上网搜一搜，哗，你唔系吓我？「伟哥，大师唔止一日写几千字，你噏多十次八次啦。」网上话，倪匡写作速度最高纪录是一小时四千五百字，最慢是一小时二千五百字。张翁出现在画面，佢话倪翁可能系外星人，当年有好多关于呢方面之传闻，所以大家唔好将我同倪匡相提并论，太高要求了。「大家好，今日吹水吹到去香港科幻大师，真系好有兴趣，我揾到其他资料可以同大家分享。」

倪匡曾经谦称自己是自有人类以来，写得中文字最多的人，不过，文坛中人话倪匡实在太过谦虚，因为唔止系中文，乜文都无人写得够佢多，亦无人可以写得够佢快。

「倪匡可以一天写几万字，佢写稿唔似写稿，更似是一台人工智能机械人，就可以打印一样，哔哔声输出文书档案咁，话说倪翁右手疾笔如飞，左手如拉布一般把稿纸拉过去，一张接一张的写，谂都唔使谂，就可以交稿。」老实讲，一星期出一本小说唔算快，你想要快啲都可以。

「辰哥，自从内地出咗一批网络小说写手，倪匡纪录可能被打破，因为知名的几位网红作家，一本书闲闲地几百万字，好多写到入厂。」长江后浪推前浪，都无乜出奇，何况呢一代人系用键盘写小说，打字快定系用支笔快，我都好想知，总言之，返番去正题，如果喺依家环境，有多啲好似《卫斯理》之系列作品，世界多美好。

香港其实有好多本地题材十分有趣，好似讲关于流行大瘟疫，沙田区、西贡区都曾经有过民间传奇，话某某朝廷大将军原来有成身正气，当年某日香港地方发了瘟，搞来搞去都搞唔掂，大将军一到，拜下神就驱走瘟疫，你话神奇唔神奇？

「安仔，你唔系讲香港民间传奇咁噃，你直情好似做紧《东张西望》，乜嘢朝廷大将军，你唔好话系钦差大臣落咗嚟香港，正在主持大局，依家帮香港人抗疫。你想借题发挥，定系借古讽今？」咦，大师兄，你谂多咗，之不过，故事如有雷同，实属巧合啫。话时话，呢个瘟疫大流行可以玩穿越剧。「安仔，你都要小心考虑一下，钦差大臣𠮶角色好敏感，尤其依家时势，你不如都系度过第二条桥好过。」

好，有乜问题，大把香港题材可以二次创作，例如大导演楚原年轻时代成名作《可怜天下父母心》（见图，黑白图片）都可以写个时空版。「世侄，呢套戏我细细个同屋企人睇，真系好赚人热泪，之不过，你搞文艺伦理大悲剧，好似好离题。」张翁，唔一定要写卫斯理科幻小说，最紧要系应景。「辰哥，你有几应景呀，上世纪六十年代之场景，你令我哋想到啲乜呢？」

大家饮杯水先啦，不如开包薯片食，Relax。「我想话你知，伟哥，当年楚原套代表作叫好叫座，成为当时香港现象，大家都体会得出电影中之香港人徬徨之生活，于是有一句顺口溜︰家家有白燕，成街张活游，呢句嘢相隔六十几年之后，你话应景唔应景？」

白燕、张活游系剧中之男女主角，生活逼人，遭遇苦过苦瓜干，你想知佢哋有几惨，上网可重温。