辰來之筆｜藍帶與茅台，你揀邊樣？
發佈時間：03:00 2022-02-15
這個新春改變我的生活，原本我想慢慢看《超時空男臣》，參考一下穿越小說寫作，點知晚晚睇冬奧。
疫情唔係人咁品，是日上去張翁中環辦公室，享受疫情下的黃昏，呢一個辦公室其實唔係辦公，係呢位金融老前輩之私人俱樂部，十幾年前買落在公司附近，閒來招呼商界朋友，又可以當迷你倉用，專門收藏書畫，同埋一啲擺設，估唔到今時今日可以當黃昏酒聚場地。
今日主角係藍帶白蘭地，因為最近呢隻酒又大賣廣告，春節前後好多地方賣到斷市，所以張翁唔開十二年威士忌，大家慢用，一樽唔夠，仲有多樽，睇大家酒量。「上世紀八十年代，我班朋友無白蘭地不歡，XO都好Hit，高級人士仲要飲成萬幾銀一瓶嘅百年拿破崙。」唉，四十年前就好景啦，起碼唔使戴口罩，又唔怕忽然有大廈圍封檢測，我聯想起今時今日好似張愛玲筆下之《傾城之戀》，香港好似淪陷一樣。
「安仔，依家大家講谷愛凌，唔好再講祖師奶奶，乜嘢淪陷，新正頭講意頭，唔好九唔搭八。」新正頭又畀你話我九唔搭八，真係唔知好嬲定好笑，不過，我都費事睬你，飲杯藍帶懷舊下先。
「辰哥，你有無玩滑雪？」銀行偉話，中環人早十幾廿年前都唔興去打高爾夫球，個個都晒命冬季去歐洲滑雪。「偉哥，我溜冰都唔會，又點識得滑雪？」張翁建議大家唔好加冰，因為飲白蘭地唔同威士忌，加冰飲藍帶係幾十年前尖東夜總會風氣，香港當年土豪作風，法國酒廠巡視香港業務，一則以喜，因為尖沙嘴係貴價白蘭地銷售熱點；一則O晒嘴，原來香港人加水、加冰大口大口灌落肚，完全不是正宗法國享受美酒之風。
「咁又點呢，白蘭地慢慢嗒，又點可以賣到如此驚人數量？」張翁唔同意我講法，始終你當藍帶好似麥記可樂咁飲，係有點那個，不過，俱往矣，香港已經無夜總會。「其實無夜總會都好，大家都興飲紅酒，最普遍係啤酒，邊有一大班人圍來開白蘭地，你估依家玩穿越劇咩。」係囉，更何況經新冠一疫，尖東已經沒有舞跳，要跳去廣場同大媽跳啦。
講開又講，大台嗰套明朝男臣穿越劇幾好睇，編劇好有心思，講下歷史又搞下笑，難得個個演員都識做戲，原本可以好好欣賞，冷不提防要為冬奧節目讓路，臨尾播幾集幾集，真係焚琴煮鶴。「安仔，你唔通又想寫個明朝穿越現代故事？」係呀，今次場景可以落在上世紀八十年代之尖東，三個男臣去咗夜總會，同一班太子妃、公主相遇，你話幾好睇呢。
張翁話，當年都有去尖東應酬，不過純粹陪朋友落去威，自己準時返屋企咁話。我心諗，你咪當我細路哥啦，你估你真係明朝穿越過來之男臣？你原來係大總管，一笑。當然，我無講出口，只係陰陰嘴咁笑。大家問我有乜咁好笑，我話︰「明朝大將軍穿越去尖東夜總會，是否要做睇場？哈哈。」
大師兄話︰「北京冬季奧運會好多是非，唔知點解？係咪西方國家唔多習慣中國呢個發展中國家都學人玩冰雪運動，正如銀行偉話齋，去滑雪人士，至少係中產階級，習主席話依家國內起碼有三億人口參與冰雪運動，即係反映國內有三億中產階級，呢個數咪係美國人口總和。」
銀行偉分析，中國中產人口一般估計三億四千萬，多過美國人口少少，不過，預測2025年中國中產人口可以達到五億，即係超過依家四億五千萬人口之歐盟二十七國，呢條數都幾嚇人。「係咁，美國西方眼紅中國都未定，不過，又唔好咁話人家，中西文化價值不同，中國搞經濟唔同西方，搞防疫又自成一格，所以大家有些少偏見與誤會啫，大家好快就會習慣。」
係囉，幾時輪到中國茅台可以跟白蘭地、威士忌一樣暢銷全球？「安仔，茅台喺內地都供不應求，我哋香港以前賣兩百蚊一瓶，依家要三千蚊。」張翁補充資料，1980年坐內地航機有免費茅台供應，落咗機去買茅台，你估幾多錢一瓶？「講你都唔信，十蚊人仔有找。」往事只能回味，當日你買幾箱返香港收埋收埋，到依家你話值幾銀？
「安仔，你咪發夢啦，你不如穿越上世紀八十年代，同我哋帶幾箱嚟。」好呀，你要茅台定藍帶先？咁又一個歡樂黃昏，飲到微醉，真係好似穿越咁。
