辰来之笔｜蓝带与茅台，你拣边样？
发布时间：03:00 2022-02-15 HKT
这个新春改变我的生活，原本我想慢慢看《超时空男臣》，参考一下穿越小说写作，点知晚晚睇冬奥。
疫情唔系人咁品，是日上去张翁中环办公室，享受疫情下的黄昏，呢一个办公室其实唔系办公，系呢位金融老前辈之私人俱乐部，十几年前买落在公司附近，闲来招呼商界朋友，又可以当迷你仓用，专门收藏书画，同埋一啲摆设，估唔到今时今日可以当黄昏酒聚场地。
今日主角系蓝带白兰地，因为最近呢只酒又大卖广告，春节前后好多地方卖到断市，所以张翁唔开十二年威士忌，大家慢用，一樽唔够，仲有多樽，睇大家酒量。「上世纪八十年代，我班朋友无白兰地不欢，XO都好Hit，高级人士仲要饮成万几银一瓶嘅百年拿破仑。」唉，四十年前就好景啦，起码唔使戴口罩，又唔怕忽然有大厦围封检测，我联想起今时今日好似张爱玲笔下之《倾城之恋》，香港好似沦陷一样。
「安仔，依家大家讲谷爱凌，唔好再讲祖师奶奶，乜嘢沦陷，新正头讲意头，唔好九唔搭八。」新正头又畀你话我九唔搭八，真系唔知好嬲定好笑，不过，我都费事睬你，饮杯蓝带怀旧下先。
「辰哥，你有无玩滑雪？」银行伟话，中环人早十几廿年前都唔兴去打高尔夫球，个个都晒命冬季去欧洲滑雪。「伟哥，我溜冰都唔会，又点识得滑雪？」张翁建议大家唔好加冰，因为饮白兰地唔同威士忌，加冰饮蓝带系几十年前尖东夜总会风气，香港当年土豪作风，法国酒厂巡视香港业务，一则以喜，因为尖沙嘴系贵价白兰地销售热点；一则O晒嘴，原来香港人加水、加冰大口大口灌落肚，完全不是正宗法国享受美酒之风。
「咁又点呢，白兰地慢慢嗒，又点可以卖到如此惊人数量？」张翁唔同意我讲法，始终你当蓝带好似麦记可乐咁饮，系有点那个，不过，俱往矣，香港已经无夜总会。「其实无夜总会都好，大家都兴饮红酒，最普遍系啤酒，边有一大班人围来开白兰地，你估依家玩穿越剧咩。」系啰，更何况经新冠一疫，尖东已经没有舞跳，要跳去广场同大妈跳啦。
讲开又讲，大台𠮶套明朝男臣穿越剧几好睇，编剧好有心思，讲下历史又搞下笑，难得个个演员都识做戏，原本可以好好欣赏，冷不提防要为冬奥节目让路，临尾播几集几集，真系焚琴煮鹤。「安仔，你唔通又想写个明朝穿越现代故事？」系呀，今次场景可以落在上世纪八十年代之尖东，三个男臣去咗夜总会，同一班太子妃、公主相遇，你话几好睇呢。
张翁话，当年都有去尖东应酬，不过纯粹陪朋友落去威，自己准时返屋企咁话。我心谂，你咪当我细路哥啦，你估你真系明朝穿越过来之男臣？你原来系大总管，一笑。当然，我无讲出口，只系阴阴嘴咁笑。大家问我有乜咁好笑，我话︰「明朝大将军穿越去尖东夜总会，是否要做睇场？哈哈。」
大师兄话︰「北京冬季奥运会好多是非，唔知点解？系咪西方国家唔多习惯中国呢个发展中国家都学人玩冰雪运动，正如银行伟话斋，去滑雪人士，至少系中产阶级，习主席话依家国内起码有三亿人口参与冰雪运动，即系反映国内有三亿中产阶级，呢个数咪系美国人口总和。」
银行伟分析，中国中产人口一般估计三亿四千万，多过美国人口少少，不过，预测2025年中国中产人口可以达到五亿，即系超过依家四亿五千万人口之欧盟二十七国，呢条数都几吓人。「系咁，美国西方眼红中国都未定，不过，又唔好咁话人家，中西文化价值不同，中国搞经济唔同西方，搞防疫又自成一格，所以大家有些少偏见与误会啫，大家好快就会习惯。」
系啰，几时轮到中国茅台可以跟白兰地、威士忌一样畅销全球？「安仔，茅台喺内地都供不应求，我哋香港以前卖两百蚊一瓶，依家要三千蚊。」张翁补充资料，1980年坐内地航机有免费茅台供应，落咗机去买茅台，你估几多钱一瓶？「讲你都唔信，十蚊人仔有找。」往事只能回味，当日你买几箱返香港收埋收埋，到依家你话值几银？
「安仔，你咪发梦啦，你不如穿越上世纪八十年代，同我哋带几箱嚟。」好呀，你要茅台定蓝带先？咁又一个欢乐黄昏，饮到微醉，真系好似穿越咁。
