專欄蘇蝦仔｜紅魔唔等得重金簽拉文斯補短板

更新時間：10:30 2025-08-30 HKT
發佈時間：10:30 2025-08-30 HKT

睇完巴恩迪亞對富咸時，10個角球9次失位；之後再睇到奧拿拿面對乙組仔，先失近柱，後再出迎錯誤，就知道曼聯一定要買門將。而家去到下一個問題，就是從安特衛普買辛尼拉文斯，佢應付高波得唔得，從比甲簽入級數夠唔夠？比利時最頂級新生代門將巴恩迪亞高6呎6吋，身形絕對出眾，但應對高空波的能力相當差，最重要係無霸氣。而辛尼拉文斯就高6呎4吋，矮過巴恩迪亞，但比奧拿拿高3吋，這身高係歐洲守門員的黃金高度，兼備靈活性、對抗和制空力。

當然這只是理論數字，還要看實質數據。辛尼拉文斯去季在比甲的成功撲救率為81.4%，是整個聯賽最高，把關技術在比利時新生代門將是最頂級，比利時國內已認為他是泰拔高圖爾斯的接班人。還有一個數據要留意，就係面對傳到入禁區的傳中球，他有13.2%能夠成功阻止，是去年5大聯賽以外歐洲聯賽最高，制空權有保證。相比之下，奧拿拿去季英超的撲救成功只有68.9%，成功阻止傳中球的比率僅得5%，完全無得比。

比甲得唔代表英超得？單論門將這位置，不少從較低水平聯賽來到英超的球員，都可以迅即適應無水土不服的問題，最新的例子就是諾定咸森林的沙斯，法甲到來僅一季半，就拎到英超金手套獎。辛尼拉文斯有成功的條件，加上曼聯的處境唔等得，這2000萬鎊點都要使﹗蘇偉業

↓立即下載星島頭條App↓