買大閘蟹釀罵戰！蟹乸當蟹公送錯貨食客致電投訴反被「辱罵長達3分鐘」店家發文公審網民唔撐：串過碼頭咕喱

更新時間：16:40 2025-10-15 HKT
發佈時間：16:40 2025-10-15 HKT

踏入大閘蟹季，不少人都會訂購大閘蟹享用，不過最近就有食客買大閘蟹卻與店家釀成罵戰，有網民近日於某專門店訂購大閘蟹，卻因收到「蟹公」而非訂購的「蟹乸」，致電查詢反遭店家「辱罵長達3分鐘」，店家事後亦發文公審該名顧客，指責對方「咄咄逼人」，不過網民卻唔撐，直指店家：「串過碼頭咕喱！」

買大閘蟹釀罵戰！蟹乸當蟹公送錯貨食客致電投訴反被「辱罵長達3分鐘」

事緣有網民於Threads發文，指最近於某專門店訂購「4両半蟹乸」，最後卻收到「6両蟹公」，由於兩者價錢及口感有別，食客心急查詢，但是店家客服「不斷Online又Offline」，未有即時回覆，於是致電聯繫。據事主描述，店家接聽電話時態度不佳，稱「好忙好多嘢做」，並指責食客「態度唔好chur住佢」，事主無奈只好「覆咗一句好等佢覆」遂決定傳訊息反映問題，不料店家隨即來電，展開「長達3分鐘嘅辱罵」，內容圍繞事主態度問題：「（佢）一直喺度鬧我，不斷誣蔑我話我迫癲佢」、「佢唔認為自己態度唔好。跟住佢開始非常激動，我都一直勸佢冷靜」。店家更表示「我只係打工仔我唔做啦」後掛斷電話。

店家發文反擊：服務唔起你呢啲「心急人上」！

事主其後在網上公開事件，指希望獲店家就自己出錯貨及態度惡劣道歉，指「客人唔係大晒，但係你賣家都唔係大晒，唔係你辛苦就可以對住人哋亂發脾氣。」

店家事後卻發文公審，表示「就算同事真係執錯嘢，我哋都未睇到WhatsApp你就已經即刻打電話嚟，同你講忙緊，轉頭幫你搞都要咄咄逼人。」又指責事主：「咁點解你攞嗰陣唔check？咁點解你食到一半先至講？你都食到一半都唔爭在等多一陣等同事覆你啦，係咪要下下都要逼人哋9秒9仲要秒速跪低道歉嗰隻？」並強調已經全數退款，反擊「唔啱嘅下次唔好再食，去食第二間」、「服務唔起你呢啲『心急人上』！」亦於事主帖文留言表示：「由頭到尾我都講冇鬧過佢」、「忙緊，係幾分鐘時間內未睇到佢WhatsApp，已經打電話嚟chur。」

網民唔撐：串過碼頭咕喱

事件引起網上熱議，有網民表示不支持店家：「明明自己做錯仲可以咁搶口嘅鋪頭真係好少見，香港啲老細真係生意好到唔憂做」、「鋪頭串過碼頭咕喱，唔知係咪有專人負責閙客。」亦有人表示光顧同一間店舖時有類似遭遇：「呢間態度係好差真係幫襯過一次都怕上年訂大閘蟹（代客蒸熟）佢送貨時段7-9pm 訂之前問佢會唔會好夜先到，因為飯局7點開始，佢仲話唔會好夜同事都想早收工，觀塘送康城我估半粒鐘都到，當晚8點未到開始追，佢不停答「差唔多到」最後8點半到，交談過程極不友善。呢間一定blacklist」、「之前叫過一次其中有一隻係壞嘅，點解會知佢係壞我諗係因為放完入口隻蟹係臭酸味啦，同佢反映返又話要收返檢查又拍片，再唔係又話冇繩/唔係即時同佢講，差果幾十蚊要呃你錢咩？最後都廢事執著果少少錢當買個教訓唔好再訂呢間野就算。大閘蟹季，大家睇路啦。」

不過亦有網民認為事主都有問題：「個客就嬲豬豬到失去理性，買嘢貨不對辦，全數退錢已經可以close file，但又唔知為乜，爭啖氣啩」、「有少少覺得一個巴掌拍不響，樓主打過去都唔知講咗啲乜，冇講粗口唔代表態度冇西。」

來源：Threads