石硤尾茶餐廳福建炒飯被讚「夠鑊氣」爆紅！網民實試列4大中伏位：同人哋嗰碟都幾大分別
發佈時間：15:07 2025-07-21 HKT
近日，有食客於社交平台分享位於石硤尾一間茶餐廳的福建炒飯，大讚「好夠鑊氣」，帖文更獲逾600個讚好，惟有網民慕名光顧時，發現眼前的福建炒飯「同人哋嗰碟都幾大分別」，更列出4大中伏位，質疑早前發文的是「打手」，刻意為茶餐廳製造名氣，又建議有計劃光顧的網民可以先參考其意見，「調低返你嘅期望值」，詳情即看下文！
石硤尾茶記福建炒飯獲讚「好夠鑊氣」 網民實測：同人哋嗰碟都幾大分別
早前有網民在Facebook「長沙灣美食及消費關注組」發帖，指一間位於石硤尾的茶餐廳，其出品的福建炒飯「好夠鑊氣」，更追問「個廚房係咪做開大酒樓」。文中指，該福建炒飯茨汁「有d（啲）料到」，足料之餘還有蜆肉，連凍飲只需五十餘元，揚言「值得分享」。
帖文發出至今已有超過600個讚好，以及近150個留言。有網民因此到該店一試究竟，雖然原本已未有太大期望，「雖然佢個樣已經知個福建炒飯唔正宗」、「
但我抱着一絲無妨嘅心態去咗試。」惟最後上桌的福建炒飯，跟早前獲力讚的出品差距甚遠！
樓主先提到福建炒飯中的蝦仁，他指「人哋嗰碟啲蝦唔係頂級，最少都叫粒粒分明。」但他眼前的炒飯，蝦仁卻是「指甲咁細」。他又指出，原帖文的炒飯「應該有火鴨絲定燒鵝粒」，但「我個碟完全冇（無）」，再指出「食嗰碟多咗啲魷魚，同啲飯味唔夾，完全唔好食！」
樓主認為，該店的福建炒飯的炒飯底不算特別出色，亦「稱不上好香嘅鑊氣」；用料上則是「老問題」，「冇（無）瑤柱絲、火鴨絲，最少都要有菜心、雞肉，呢啲茶記版福建炒飯用三色豆，本身件事已經錯X哂。」
該網民又表示，不肯定「究竟之前某人介紹嗰碟係打手post，特登用多啲料出個post定係咁啱我食嗰時啲用料冇（無）晒，求其炒俾我。」惟希望有計劃前往一試的網民可以「調低期望值」。
網民對三色豆最反感：廚師無份執著
不少網民都直言認為該碟福建炒飯不太吸引，其中大部分意見對用上三色豆最為反感，「點會用反人類三色豆」、「用三色豆blacklist」。另外，有人認為由粵菜酒家流傳到港式茶記，福建炒飯或揚州炒飯「已經無分正唔正宗」，只有「講好唔好味」，而用上三色豆而不用芥菜，反映「廚師無份執著」。
文：TF
資料及圖片來源：長沙灣美食及消費關注組@Facebook
延伸閱讀：尖沙咀小食店驚現「離譜」英文翻譯 中英直譯錯漏百出 腸粉變「腸道粉末」/「double fight」=？ 網民爆笑：唔寫好過寫
