中環平靚正｜鬼佬公司飯堂變地痞大排檔獲氣小菜$48起同場免費唱K 勁播陳奕迅、Twins廣東歌

中環平靚正｜鬼佬公司飯堂變地痞大排檔鑊氣小菜$48起同場免費唱K 勁播陳奕迅、Twins廣東歌

更新時間：18:03 2025-07-03 HKT
發佈時間：18:03 2025-07-03 HKT

中環平靚正｜結業潮不絕，飲食業要迎難而上，少不免要積極轉型。一向擅長搞法國菜、意大利菜等高級餐廳的飲食集團「Black Sheep」，近日進軍新領域，在中環自家公司飯堂開設全新「平靚正大排檔」，即日起至8月31日，期間限定大賣香港地道撚手小菜及港式鑊氣小炒。小菜每碟低至$48起，而且營業至凌晨，令中環夜生活不再只有清一色酒吧和Clubbing!

人氣鬼佬中菜「口利福」主廚中環搞港式大排檔「平靚正」 $48起食鑊氣小菜+唱K

全新「平靚正 Peng Leng Jeng」大排檔位於蘇豪士丹頓街，由中環高級中菜「口利福」主廚 ArChan 及 Jonathan 主理。口利福的出品，每碟都基本三、四百元，「平靚正」的價錢就相對親民，各式小菜由$48到 $218不等，大部份都百多元有交易。

為了重現港式小菜最重要的鑊氣，「平靚正」特製高火力爐頭，確保每道菜都熱辣辣上枱，帶有鑊氣必備的微微焦香。必試菜式包括泰式酸辣凍茄子（$48）、椒鹽避風塘粟米（$98）、求其小炒王（$138）、黑椒脆薯牛柳粒（$218）、外脆內軟煎蠔餅（$168）、咖喱椒鹽真鮮魷（$168）等，配上一碗懷舊豬油撈飯（$38）、呷兩口冰凍啤酒，風味十足。

限時開放專屬飯堂唱K飲酒重現大排檔歡樂氣氛

「平靚正」的位置本來是 Black Sheep 團隊的專屬飯堂，為了搞大排檔，限時兩個半月開放給公眾食客。餐廳由菜單到裝潢都完美重現港式大排檔格局，摺檯、紅色膠凳、紙皮石階磚仔，侍應穿著經典白色恤衫，視覺效果經已滿分。加上現場大播陳奕迅、容祖兒、Twins等回憶殺廣東歌，食客興起更可以拿咪唱K高歌一曲，氣氛熱烈好玩。

BLACK SERIES優惠 $188任揀兩款小菜

想更抵地嘆小菜，即日起至7月18日就是好機會。Black Sheep 集團慶典「Black Series」載譽歸來，旗下餐廳大做折扣，「平靚正 Peng Leng Jeng」則推出每位$188的優惠，可任選兩款餐牌上的港式小菜。平日賣$218的豉椒炒蜆炸饅頭、黑椒脆薯牛柳粒等，一樣有得揀，非常抵食。