MIRROR ACE｜MIRROR12子齊齊打邊爐 姜濤坦言飲到「上頭」 Alton公主抱：我見到光啊 Lokman盼成員享受團con
發佈時間：16:45 2026-10-30 HKT
ViuTV全新團綜《MIRROR ACE》由10月12日起，逢星期一至五晚上10時30分播出。《MIRROR ACE》透過不同任務、遊戲、挑戰，呈現MIRROR 12位成員於綜藝、舞台及團隊合作等範疇的ACE定位；同時透過團隊「One and All」精神，讓觀眾見證12子如何成為舞台上最具實力及影響力的香港ACE男團。
姜濤頻叫英文名受罰
今晚（30日）即將播出最後一集，節目組安排MIRROR坐埋一圍打邊爐，一邊吃飯，一邊玩小遊戲，氣氛快速升溫。本集有一個規則，所有MIRROR成員都不准叫其他成員的英文名稱，要直呼對方中文全名，如果不小心說出對方英文名稱，需要罰飲一杯，姜濤多次不小心說出不同隊友的英文名，頻頻被罰，飲到面紅耳赤，更直指自己飲到「上頭」。在某輪小遊戲中，姜濤抽籤抽到一條問答題：「假如你遇到8年前的自己，請畀3個建議佢」姜濤答：「唔好買樓，唔好考車牌！同埋，買某隻股票！」邱士縉（Stanley）問買邊隻股票，姜濤問：「出得街㗎咩？」江𤒹生（AK）笑言：「你都醉啦。」呂爵安（Edan）馬上炒熱氣氛大叫：「姜濤飲杯！姜濤飲杯！」兄弟齊齊歡呼，姜濤坦言：「堅係上頭啊真係！」
陳卓賢推薦Alton抱姜濤
除此之外，王智德（Alton）抽籤抽到一條任務題：「揀一位成員公主抱佢。」，陳卓賢馬上帶頭推薦Alton抱姜濤，兄弟齊齊吶喊助威「姜濤！姜濤！」，Alton認真思考：「我依家諗緊我聽日有冇嘢做，承唔承受到傷害先，公主抱姜濤，我應該真係唔得。」兄弟齊呼：「你得嘅！」楊樂文（Lokman）笑言：「你平時唔係咁㗎喎！」Alton最後接受挑戰，迫不及待的姜濤興奮大叫：「Let's go！我嚟啦！」Alton最後有成功抱起姜濤數秒，一邊喘氣：「我見到光啊。」比喻自己累到上天堂。
MIRROR準備團體演唱會
最後一集，MIRROR各人都訴說了不少感受，柳應廷（Jer）分享：「我成日都覺得我哋呢個團呢係爭咁一啲一齊玩，一齊經歷工作以外嘅嘢，咁所以呢個節目係好好，畀我哋一個機會相處。」邱傲然（Tiger）分享：「同埋我覺得最珍貴嘅唔係鏡頭前面拍到嘅嘢，而係鏡頭後，我哋好難得可以齊人去經歷一啲時光，即係打機、嗌咖啡、食早餐嗰啲。」MIRROR完成手頭上的個人工作後，大家便要開始準備團體演唱會，Lokman寄語：「我覺得今次個團Con係複雜嘅，同埋我相信大家都會想同以往有少少不同，希望大家會enjoy呢個表演，同埋希望大家所有嘢都順順利利。」
