Jeremy保密團綜內容︰一定會坐低傾心事 有留意五索網片認似樣
發佈時間：19:16 2026-08-08 HKT
MIRROR成員李駿傑（Jeremy）今日（8日）出席首張演唱會藍光碟《Jeremy Lee Rise In Love Live 2025（Blu-ray）》簽唱會，吸引近500位Unicornsss（粉絲暱稱）到場支持。Jeremy甫一出場便演唱《阿波羅》及《半》，令全場粉絲尖叫，不少樂迷更在《半》期間一同合唱。及後Jeremy邀請粉絲上台玩遊戲，特別選中一位用心打扮成《黑蛇傳》MV蛇女Dancer造型的女粉絲，其餘亦有帶黑蛇玩偶等道具配飾；另一遊戲環節中，Jeremy更親自挑選幾位幸運粉絲上台，由他親自教跳《黑蛇傳》副歌舞步，更有幸與Jeremy同台跳一次。最後Jeremy在開始簽名前，在四位MV女舞者伴舞下，跳唱新歌《黑蛇傳》成為全場最高潮！
Jeremy密密出歌
李駿傑於簽唱會後接受訪問，談到演唱會藍光碟採雙封面設計，並有演唱造型頭盔剪影元素，他表示今次未有親身參與設計工序，但驚喜設計師的用心，並將自己喜愛、最精彩的舞台造型呈現在封套之上。Jeremy更將一套多張在演唱會上拍攝的即影即有相片，印製成複本成為藍光碟附送小咭，笑指甚少有大量後台紀錄相片，畫面相當珍貴希望與Unicornsss分享。Jeremy亦透露將會繼《黑蛇傳》後再出新歌，MV將於月底進行拍攝：「要拍完團綜先得閒，生日之前應該冇機會出到，起碼生日後⋯⋯趕得切都希望係生日禮物。」風格將繼續走暗黑路線，畫面會有不同的電影感，更自爆拍MV預算要減：「《黑蛇傳》太貴喇，Budget已經畀佢用盡咗！其實我哋唔一定要有大budget都可以用心去做。」
Jeremy不傚法陳卓賢除衫
至於再開個人演唱會方面，Jeremy表示年底MIRROR要開騷，今年內未有機會，最快亦要等到明年：「當然越快越好啦，其實腦海入邊已經知道晒要做啲咩，而家都仲係計劃緊嘅狀態，我會努力同公司爭取！」早前陳卓賢（Ian）演唱會除衫騷肌片段在社交媒體瘋傳，Jeremy笑指會堅守尺度與原則：「冇人贏得到佢！我諗大家要除褲先可以！（你打算除褲？）我唔會，除衫都冇嘢睇，因為我係一條柴！大家唔使幻想啦，每場都叫我除衫，我已經習慣咗，唔會應承！」
Jeremy對團綜內容保密
至於即將在港開拍的MIRROR團綜，Jeremy強調留港拍攝與任何隊友個人因素無關：「其實我哋本身已經hold咗呢段當期，討論咗好耐，原因我都唔知，最終答案係喺香港拍。（因大家工作要留港？）其實Stanley（邱士縉）都啱啱飛咗台灣宣傳，所以唔關任何人工作日程事。」Jeremy亦對團綜內容保持神秘，表示必定有大家圍埋坐低傾心事環節。
Jeremy想識五索
五索（鍾睿心）日前於社交媒體拍片，背景以電視播放《黑蛇傳》MV，並力撐Jeremy得體地回應與他無關的「爆波」事件。Jeremy笑指有留意影片，並留言致謝，不過一直未有機會認識對方：「我就唔識佢嘅，未見過面，但好似有共同朋友，睇吓有冇機會。（找機會實證撞樣？）佢扮我First Take已經好似，有時睇到佢嘅影片，都覺得點解呢個角度咁似我？幾好笑！」
