《愛回家》大結局被轟火箭式收尾 硬銷《三代同糖》網民直斥揸流灘：仲叫乜嘢開心速遞？
發佈時間：13:05 2026-08-08 HKT
TVB處境劇《愛·回家之開心速遞》已於2026年8月7日播出第2868集終極大結局，圓滿結束長達九年半的播映歲月。大結局劇情溫馨爆笑兼備，驚喜迎來「雙喜臨門」的完美收場，劇中「熊若水」與「大小姐」龍力蓮同時宣佈懷孕，令熊、龍兩家迎來三代同堂，大四喜更再度合體以Rap壓軸演出，熊樹根最後一句「記住我哋，後會有期」，不少劇迷在網上洗版式討論，掀起一輪熱話。
網民留言炮轟結局揸流攤
有不少網民留言炮轟結局揸流攤，難睇到令人難以置信：「熊心如、Max同Vivian都冇出現，連提都唔提，安仔叫Bonnie做蔥嫂，淨係講熊家啲人齊晒。」甚至還有人說：「大結局promote《三代同糖》至少用咗5分鐘，呢套劇唔係得熊家同龍家㗎。熊家好似當從來冇三妹呢個人咁，朱凌凌同池富冇得同家人團聚，仲叫乜嘢開心速遞？我唔係要呢個結局啊，編劇你諗緊啲咩？」
相關閱讀：愛回家大結局｜熊家成員因熊樹根決定留港 熊尚善助龍力蓮新公司開幕 大小姐宣布懷孕完美收場
大結局被轟趕收工而胡亂塞滿大團圓
隨著人氣處境劇集圓滿落幕，劇中多段交織已久的感情線終於迎來終極走向，瞬間在網絡討論區引發兩極評論！有人歡喜有人愁的劇情安排，讓一眾劇迷看得相當肉緊。對於喜歡喜劇收場的觀眾來說，大結局的最大亮點莫過於「卜卜脆」羅皓誼與「Terry」李偉健這對歡喜冤家！兩人經歷重重波折後，有情人終成眷屬，不少觀眾留言表示安慰：「終於等到呢對活寶開花結果！」但最令粉絲崩潰的是，金城安在眾人面前親叫Bonnie做「蔥嫂」，隨即惹來大批忠實粉絲狂轟，直呼無法接受：「編劇根本喺度傷粉絲的心。」、「根本係鞭觀眾個屍。」、「10年劇就咁完咗，真係好失望。」不少觀眾指出，最後幾集為了在 2868集死線前完結，所有長年累積的伏筆、接龍集團的爭產危機，全部都在短短一兩集之內「超高速」解決：「《愛回家》最後兩集難睇到難以置信，唔係講笑。原本仲好期待十年嘅大結局會係點，中間塞個《三代同糖》入去，又唔連貫，佳叔上一秒同龍敢威反面下秒又突然組團慶祝開張，madam ceci吞咗接龍集團又係不明不白，龍力蓮莫名其妙有咗個細路，所有現有情侶線突然喺晒一齊 ？好失望，真係好失望！」、「「擺明就是為了趕收工而胡亂塞滿大團圓元素，完全沒有鋪排，看得人一頭霧水！」
相關閱讀：愛回家大結局丨歷年逾30位神級客串逐個數 古巨基變外賣仔最破格 歐陽震華情陷群姐
網民斥大結局牽強同九唔搭八
網民對《愛回家》結局的討論越講越激烈，有人更說：「特登開返大結局嚟睇，結果好似畀人喂咗pat屎咁，酒樓影相以為會有紅衫魚客串，結果hardsell《三代同糖》，最後rap都唔知點解會畀風少同素素，又隔硬講「蔥嫂」，無啦啦又整Terry同卜卜脆一齊，大小姐又無啦啦有咗，計劃咗咁耐要離開香港，真係會臨時因為擔心根叔自己一個喺屋企而決定留返底。」、「今次《愛回家》嘅大結局的確有啲牽強同九唔搭八，真心感覺編劇有啲趕收工跟住夾硬交個結局出嚟。」、「唔係感覺，真心戇X，2000嗰集仲似真結局。」、都無喇喇火箭式收尾，明明之前一係就冇寫過，就算有都冇深入寫到可以收尾嘅程度，但係全部都即刻由0跳到100，仲有最尾嗰段kam到爆嘅rap，哇我真係睇到呆咗，我寧願你bbq。」、「大結局我到底睇X咗啲乜嘢？ 以前好好睇㗎！今個禮拜嗰啲唔掂都算啦，今集大結局有返啲期望，睇咗頭15分鐘，好似嗰啲30秒reels剪埋一齊咁左一忽右一忽。」、「其實演員離巢啫，熊心如未死嘅，熊家都仲記得啤啤，但佢以前最鍾意嘅『高腳』呢？ 金城安嘅三姨呢？提下佢個名唔使死嘅，跟著啲cp有啲夾硬，仲要係咁三代同堂，我笑咗 。其實我成年冇開電視，之前都係網上睇重播，為咗個大結局特登開，你整個咁嘅結局，寧願由第一集開始睇返《愛回家》，都唔睇《三代同糖》。」
相關閱讀：愛回家大結局｜7大綠葉身家過億背景驚人 三太私伙鱷魚皮Hermès拍劇 蘇姐原來是半山樓后
