《中年好聲音2》選手撰長文悼念外公含淚約定天國見 曾曝光悲慘童年與母疏離 由公公婆婆照顧長大
發佈時間：22:00 2025-10-19 HKT
42歲的黃劍文在娛樂圈浮沉多年，2023年參加TVB節目《中年好聲音2》，曾曝光悲慘身世，從未見過生父的他，童年時與母親關係疏離，自幼隨公公、婆婆、姨媽生活，長大後雖然跟媽媽重修關係，卻在其26歲生日時母親自殺離世。黃劍文的外婆兩年前逝世，失去親人的他，昨日（18日）再撰長文悼念外公。
黃劍文外公與世長辭
黃劍文昨日在IG分享多張外公的照片，透露外公與世長辭：「今日參與公公送別禮悼念安息聚會，公公細個就教我，男人流血不流淚，我最記得第一次見到公公流淚嘅時候，大概九年前，婆婆患咗大病做手術，公公見到婆婆喺醫院好辛苦嘅樣嘅時候，佢忍住冇喺婆婆面前喊，行出病房門口嘅時候，我見着佢崩潰，喊住講，見到婆婆咁樣好陰公，嗰次佢喊到好似細路仔咁。」
相關閱讀：黃劍文澳洲短宣獲90歲婆婆感激 12年後重回首次busking地方 趕不及批文照唱45分鐘
黃劍文指外公重感情又夫妻恩愛：「見到公公對婆婆嘅愛好深厚，有時唔會用說話去表達，但係公公嘅行為同行動就知道，佢好愛錫婆婆，男人流血不流淚，但係因為觸碰到愛，就會落淚。」黃劍文回憶起外公第二次喊到好似小朋友的時候：「就係佢話俾我聽佢點樣信耶穌。」
黃劍文指外公信耶穌的經歷有點特別：「婆婆喺大病，康復完之後，因為婆婆經歷到耶穌聽祈禱醫治佢嘅病，當時我開始陪婆婆返教會，而公公亦都一樣，星期日就會陪婆婆一齊去教會。」外公每次返教會，黃劍文都會傾有關耶穌的救恩，又會問外公是否相信耶穌？黃劍文表示：「佢每次都話佢唔信耶穌㗎，但係每次佢聽詩歌，都見到佢落淚，但係佢都話佢唔會信耶穌㗎。」
黃劍文獲網民慰問
黃劍文透露外公養大九個仔女的辛酸：「同我哋講佢經歷到耶穌，佢話佢喺夢中耶穌同佢講嘢，佢話耶穌同佢講叫佢唔使擔心，我會看顧你嘅仔女你嘅兒孫。公公以前做苦工養九個仔女，佢工作好辛苦，但係佢自己一力承擔，佢冇乜點同人講過 佢工作嘅辛苦同埋遇到嘅危險，佢話佢喺夢中耶穌俾佢安慰。公公就係咁，佢經歷到耶穌俾佢嘅安慰，佢就信咗耶穌，講嘅時候喊好似細路仔一樣。所以七年前嘅5月20號公公同婆婆一齊受浸歸入基督」。
黃劍文謹記外公的教導：「公公去天國搵婆婆，我哋遲啲天國見。你教我男人流血不流淚，唔好意思！我今日流淚因為感謝你喺我生命當中，教曉我嘅嘢，你雖然口不會說愛家人，但你行動話俾我哋聽，家人嘅重要，你對家人嘅愛，永遠懷念你開懷大笑嘅樣子。係你話俾我聽，你會為我所做嘅感到驕傲 #公公 #多謝你 #愛 #家人」，不少網民向黃劍文送上慰問。
相關閱讀：黃劍文演唱會丨殿堂級玉女驚喜現身！大晒麒麟臂台上表演換衫全場起哄
