「熱氣球」KOL何小姐回應指控否認存心欺騙 稱與前TVB女星陳佩思合夥零食店無利可圖

近日備受爭議的「熱氣球」KOL何小姐（菠丹），就多項針對其誠信的指控，接受了YouTube頻道《會十八》主持人姚家豪（阿Bu）的專訪，作出了詳細回應。爭議包括與前TVB女星陳佩思的生意糾紛、設計師Josephine的欠款問題，以及與家人的關係等。在訪問中，何小姐承認過去在處理事情上有不足甚至錯誤，但堅稱自己從未存心欺騙任何人。

何小姐稱與家人關係疏離

對於外界好奇她與母親關係為何會從昔日的親密（母親曾為她煲湯、照顧孩子）演變到近乎十年不見，何小姐澄清這並非單一事件導致，而是長期積累的結果，「其實真係我同我父母本身關係都好疏離，所以唔需要啲咩大吵大鬧，唔需要咩好大件事。」她更透露，當時母親的幫忙並非外界想像中單純的愛，而是有金錢往來。

相關閱讀：「熱氣球KOL」何小姐黑歷史連環爆？ 前TVB女星陳佩思成苦主遭連累通緝：還我公道

另一苦主現身指控何小姐

何小姐反駁陳佩思指控

前TVB女星陳佩思早前指控何小姐在合資的零食店生意中賬目不清，並突然「失蹤」。何小姐在訪問中詳細解釋了當時的困境，指生意從一開始就已舉步維艱，每日營業額極低，根本無利可圖。她說：「我哋基本上星期一至四，可能得嗰百零蚊到幾百蚊嘅生意，你要知道零食呢樣嘢，可能係10蚊，可能得一兩蚊賺，我哋嗰陣時講緊最低紀錄，係109蚊一日，嗰一日得幾蚊雞賺，計埋燈油火蠟，雜費一個月可能係兩萬幾。當其時間舖喺瓊華中心頂樓，人流好少好少。大家都心知肚明，嗰陣時係窮到點呢？埋完貨出去，應該係有個現金再去訂貨，我哋係冇錢到去一個地步，要行去隔籬街，要去零食店買10包8包桃哈多擺喺舖頭。」她續指，如果當日生意逾千元已經非常開心。她表示，由於生意無法維持，加上自己與陳佩思各有各忙，最終只好將店舖交由一位名叫Herbert的朋友接手「自負盈虧」，並承認在交接過程中，沒有簽訂任何合約是她的疏忽。

相關閱讀：「熱氣球KOL」何小姐13字反擊前TVB女星陳佩思 態度寸爆將拖糧責任推畀拍檔 多位苦主圍剿

何小姐回應多宗金錢糾紛

在訪問中，何小姐也就其他多項金錢指控作出回應，包括設計師Josephine的欠款、Playgroup的退款問題等。就拖欠設計師Josephine款項一事，何小姐解釋當時因另一個生意夥伴「攞走晒公司啲現金」，導致她資金周轉出現嚴重問題，無法即時付款。她為當初沒有及時通知對方及交代清楚表示歉意：「嗰樣嘢係我做得唔啱嘅地方，我都要同你講聲對唔住。」並表示該夥伴現已承諾會處理欠款。

相關閱讀：熱氣球嘉年華丨宣萱先係大贏家？ 坐熱氣球「成功升空」片瘋傳 網民推爆：贏咗99.9%香港人

自認人生混亂願承擔責任

何小姐承認因負責財務的同事已離職，導致部分退款處理混亂。何小姐表示：「如果有人未退款，你哋就搵我啦！」並承諾只要對方能提供證明，她願意私人退款。在訪問中，何小姐坦承自己的人生一直處於「混亂」的狀態，尤其在金錢和數字上非常不敏感，過於容易相信別人，是她性格上的缺陷，「我成個人生就係咁樣……就係咁chaotic（混亂）。」她強調，儘管過往在處理手法上有許多不足之處，但她絕無欺騙之意。她向所有受影響的人道歉，並公開承諾，若任何人認為她有虧欠，歡迎直接與她聯絡，「你只要你過嚟搵我，你嗰件事合情合理，你有證據我真係爭你啲咩嘢，我一定畀你。」

陳佩思轟不要繼續張開眼說大話

陳佩思其後在IG為事件作出回應：「我也有必要回應和實說當時零食店的狀況，因為跟何小姐說的有非常大差距。何小姐，你要知道當時我們開的是有限公司，我們是有責任每年報稅和提交Annual report，不是你隨便的一句交俾Herbert打理，我們就沒有了責任，租約是我們公司簽的，我哋沒有和Herbert 簽任何法律文件，咁又點可以隨隨便便交俾Herbert打理呢，而我哋就拍拍屁股離開，佢只係我哋嘅「員工」，幫我哋手，而且你喺片度都提過佢要養病，佢又點會take 咁大個risk 去接手一盤要自負盈虧嘅生意。你不負責任一聲不響地就走咗失蹤，揾唔到你，我是你的partner，如果我都唔處理，你同我都會俾人拉，你唔介意，我介意。你最後冇事係因為我幫你承擔左你的責任，讓你繼續喺外面逍遙法外。請你仔細想清楚所有法律程序，你說你有好多間公司，有好多生意，唔係咁簡單一個道理，你都唔明白吖嘛。片段05:30何小姐荒謬到，話成間舖俾咗Herbert，而Herbert係唔收人工？自負盈虧。
但係佢一開始已經話我哋間鋪係唔賺錢打個和，已經叫做賺咗，人哋見到呢個情況又點會仲肯自負盈虧呢？唔收人工呢？P.S當時我哋係有比Herbert每日嘅人工。10:50佢話送咗間舖俾Herbert，咁點解我仍然會收到政府嘅通緝？點解政府唔係直接寄信俾Herbert係寄俾我？
而舖頭嘅名仍然係我、交租仍然係我，政府通緝係我，而唔係Herbert！你哋兩個唔喺度之後我仍然要維持租約，因為租約未完需要繼續履行，我周圍請part-time返工，我仲要周圍頻撲搵會計師幫我做返所有嘅Annual report，報稅同埋audit！驚比政府告！咁點解Herbert可以完全唔使做呢啲程序。我隔住個mon簡直係嬲到血壓上升到200。你全部都係大話，冇邏輯嘅大話，我當日心力交瘁咁樣去做呢啲paper work ，佢就不負責任講話間鋪送咗俾人，自己唔洗理，你係無理呀，因為處理嗰個係我。完全唔make sense ，請不要繼續張開眼說大話。」