193自爆遭性騷擾 擦高層鞋「金仔」變「金老師」 呻窮𢱑撈︰可拍衛生巾廣告
發佈時間：19:15 2025-09-15 HKT
ERROR成員193（郭嘉駿）、鄒凱光、駱振偉及譚凱倫今日（15日）錄影新節目《晚吹：男人亂講嘢》，193指加入譚凱倫從女性角度分析，又表示話題大膽，笑稱自己是偶像派，故不會參與性騷擾話題的討論。
193驚畀人「咸豬手」
問到是否曾遭性騷擾？193表示「有」，會在節目中爆料，笑指若胸肌再練大點就會被揸。至於怕不怕再亂講嘢得罪人？193說：「唔緊要，我不嬲出名得罪人多稱呼人少，唔怕得罪人，（節目中）都有出賣公司同事。」193在7月時被屈暗撻Lolly Talk成員Tania（陳紀澄），事後他即澄清，甚至放話指某公司打手不要搞他，他表示最嬲是相中的男仔那麼矮，卻竟說是他，「真係影到我，我唔介意，最多我唔認，但嗰個唔係我仲要咁矮，我就有啲嬲。」193表示不想經常上新聞，亦不想被討論，連登對他的評價也不是太好：「畀我靜吓，我想嘈嘅時候自己會講嘢，同埋嗰排出新歌，都想攞啲流量，咪講吓囉！」至於事後是否有找對方傾傾？他表示有，認識Tania，會一齊打籃球。
相關文章︰193郭嘉駿不甘被屈與Lolly Talk成員Tania地下情 點名連登仔：麻煩你唔好搞到我
193建議Dee申請破產
ERROR另一成員Dee（何啟華）入市大埔新盤兩個單位後，早前在IG透露成為負資產，更公開𢱑撈，193就叫對方申請破產，成為ViuTV第一個破產的藝人。193大爆阿Dee仍然很揮霍，私下應很有錢：「不過破產Dee就唔可以搭的士，佢成日搭的士。我可以車佢嘅，如果佢破產嘅話我就做佢的士司機，佢唔使畀人拉，三年後又一條好漢，佢拍咁多電影應該好有錢，債務重組好快搞掂。」提到Dee𢱑撈，193指大環境經濟差，自己也要𢱑，又表示自己廣告費相宜，做甚麼也可以，就算拍衛生巾廣告也沒問題；同時表示自己有很多歌，做商演可以唱成個鐘，問是否有找新任MakerVille行政總裁的金廣誠反映？他即由「金仔」改口稱呼對方為「金老師」，表示一知道對方升職即擦鞋恭喜對方，更把對方訊息置頂：「跟住同佢傾，就話你升咗職有話事權，我哋咁friend你又睇住我大，大家傾多啲工作，話希望下年可以出10首歌同keep住拍劇拍節目，我對佢要求咗好多嘢。」
ERROR成軍7周年拍團綜
193坦言與金生的感情很好，問到對方如何回覆？193說：「佢話睇吓點先，續咗約先算！」雖然193表示很愛公司，也歡迎其他公司給予Offer，笑說等自己有機會拒絕對方，又指在擦鞋方面敢認第一無人敢認第二。提到保錡早前傳與菊梓喬分手，193笑言也不肯定對方是分手還是在一起；稱而家各有各忙，很久沒有聯絡，同時透露今晚ERROR齊腳食飯，問到會否關心保錡？他表示不需要，男人不會談論那麼婆媽的事情。至於ERROR何時合體？193表示好快，透露正在錄新歌，而12月ERROR成軍七年，會有新搞作，亦指下年齊人拍團綜，衝出香港周圍玩。
