翻盤下半場︱魯文傑曾遇中年危機自覺冇用 黃浩然自認惡頂想改過自新
發佈時間：17:17 2025-08-27 HKT
ViuTV新劇《翻盤下半場》由黃浩然、周家怡、魯文傑、張達倫、敖嘉年、黃長興等人主演，故事講述破產的一家人如何扭轉命運。《翻盤下半場》劇情提到主角仇強人生下半場遇上巨變，而剛踏入50歲的黃浩然笑言自己近年性情大變，表示「做咗咁多年衰人，都做返好人啦！」黃浩然與《翻盤下半場》編審龍文康及魯文傑三個中佬一同接受訪問，大談當年合作《巾幗梟雄2》到現時的《翻盤下半場》，他們的人生有何覺悟？
翻盤下半場｜TVB舊人再聚想當年
編審龍文康、黃浩然、魯文傑都曾在TVB工作，今次卻在另一個電視台有新合作，希望帶來與別不同的作品。《翻盤下半場》故事圍繞黃浩然飾演的仇強，與太太蒙美（周家怡 飾）、兒子仇樂城（歐鎮灝 飾）一家人如何面對破產，頭幾集已非線性述事，而是以不同人物的角度去講故事。黃浩然說：「我睇劇本之前，經理人已經話好正，一定要接！但有個仔廿幾歲，要演係個好大嘅挑戰，同時對我演藝生涯好大幫助。事實係真嘅，你問我，以前嘅劇本我都覺得有需要調教，但今次我完全忠於原著，一丁點都冇郁過，仇強呢個人物好完整，我對於所有嘢都好有共鳴。 」
黃浩然口中的「挑戰」，包括了增肥及展現老態，還要演一個懦弱小男人，「要增肥爭20磅，要有中年嗰種老態，我都攞我啲中學同學做藍本，𡃁仔嗰陣明明好瘦，而家有肚腩，要整吓整吓條皮帶，我都刻意加咗少少小動作，其實係（參照）我同學 。」至於魯文傑則演他的舊同學兼好兄弟，他說：「我幾鍾意劇本講生活上發生嘅嘢，朋友間嘅感情。」而事實上，兩人都確實是一對老拍檔，黃浩然：「我同魯文傑《巾幗梟雄2》（巾幗梟雄之義海豪情）嗰陣已經合作，十幾年喇，已經好耐冇合作過！但佢嘅舞台劇我有支持，佢全裸我有去睇！哈哈！但今次再合作真係好開心，以前嘅感覺返晒嚟，尤其啲抵死嘢，周家怡都話，你哋班友cut咗機都唔似cut機嘅！就係信任、輕鬆、放心。」
翻盤下半場｜與主角們的中年人生和應
龍文康表示，自己起初對破產題材不特別有感，但想深一層，卻發現這個題材可以很闊，「ViuTV問我，有個破產嘅題材有冇得諗，但我諗破產其實就係人生嘅低潮。而家全球個情況，好似大家都破緊產，唔知要等幾耐。」黃浩然亦表示，劇中的仇強，與自己有很多共鳴處，「我啱啱今年踏入50歲，踏入個5字真係好奇怪，突然覺得自己老咗好多！我做咗啲咩呢？會懷疑自己，有咩豐功偉蹟呢？有時都會沉溺咗係一啲位置，但正正呢齣戲提返我，有老友、有老婆有仔陪你一齊行。」魯文傑：「劇入面有講到我哋一班同學去殯儀館。我自己現實中都有去，坐落去係有感覺，同學過身，我都咁上下喇喎！會諗健康、仲有咩未做？有咩未試？」戲如人生，活像現實中的寫照。
翻盤下半場｜魯文傑曾自覺「冇用」
影視界正面對寒冬，台前幕後都面對缺乏工作、手停口停困境，而黃浩然亦不例外，「啱啱有部戲（《私家偵探》），有唔少人話幾好喎，做得唔錯喎，我話多謝，但而家冇戲開喇，所以係點樣保持正能量。講逆境，而家真係人生最逆境喇！就算疫情我都不斷開緊劇，但講真而家真係靜。 」龍文康：「永遠唔知道下個chance幾時會無端端嚟。」所以黃浩然就身體力行，在空餘時間做足準備，「今年年頭我學返唱歌，好多人都唔知我初初入行簽杜琪峯，其實係想出唱片！後來就擺低咗好耐。咁多年後我學返唱歌，又學戲、舞台劇嘅workshop去充實自己，到4月我就接到個舞台劇，原來所有嘢都對舞台劇好有幫助。學戲好多都係素人，大家話：『吓？你都嚟學？』我話係呀，想explorer下自己就要嚟學。」
至於活躍於舞台劇界的魯文傑，更曾一度自我質疑，「我真係有中年危機，有一次我同白只去飲嘢，覺得自己喺舞台界冇乜用，仲可以做到乜嘢？好彩托賴，之後都有人搵，結論係唔好諗咁多，唔好沉醉喺負能量入面，做好自己，啲好嘢就會返嚟。」而龍文康則指：「可能我本身就唔係咁享受安逸，如果唔係已經入咗電視台安安定定咁做，我覺得自己唔適合。個世界已經唔同咗，我就要搵個可能性同埋生存，係要尋找。仲有咩想講？用咩形式去講？」既選擇踏出舒適圈，就要努力尋找機會。
翻盤下半場｜黃浩然：我都翻盤啦
黃浩然經常飾演正氣角色，但他老實表示，從前的他生人勿近，尤其是趕拍劇、工作中的自己，「以前我好鍾意做主導，理埋人哋嘅嘢，我覺得嗰樣嘢啱，就唔會理其他人感受。但今次我完全放手，淨係理自己嘅部分。講真我開咁耐工，都冇試過老婆會話：『你開完工咁正面嘅？好多嘢分享！』我都唔覺嘅，但呢個戲畀到好多好嘅回憶我。我都慢慢轉變，以前嘅我畀到人好大壓力，而家都學，唔好要人咁辛苦，自己都換個角度睇事物。」他更笑指，連拍檔周家怡都感受到他的改變，「做咗咁多年衰人，都做返好人啦！我都翻盤啦！家怡都話：『你都唔係衰人嚟嘅，你都係想件事好啫，不過你用嘅方法錯咗！』講真，而家只係想任何人都開心，真係呢幾年開始追求嘅嘢。 」想不到戲外的黃浩然，一樣在人生下半場決心翻盤。
