翻盘下半场︱鲁文杰曾遇中年危机自觉冇用 黄浩然自认恶顶想改过自新
发布时间：17:17 2025-08-27 HKT
ViuTV新剧《翻盘下半场》由黄浩然、周家怡、鲁文杰、张达伦、敖嘉年、黄长兴等人主演，故事讲述破产的一家人如何扭转命运。《翻盘下半场》剧情提到主角仇强人生下半场遇上巨变，而刚踏入50岁的黄浩然笑言自己近年性情大变，表示「做咗咁多年衰人，都做返好人啦！」黄浩然与《翻盘下半场》编审龙文康及鲁文杰三个中佬一同接受访问，大谈当年合作《巾帼枭雄2》到现时的《翻盘下半场》，他们的人生有何觉悟？
翻盘下半场｜TVB旧人再聚想当年
编审龙文康、黄浩然、鲁文杰都曾在TVB工作，今次却在另一个电视台有新合作，希望带来与别不同的作品。《翻盘下半场》故事围绕黄浩然饰演的仇强，与太太蒙美（周家怡 饰）、儿子仇乐城（欧镇灏 饰）一家人如何面对破产，头几集已非线性述事，而是以不同人物的角度去讲故事。黄浩然说：「我睇剧本之前，经理人已经话好正，一定要接！但有个仔廿几岁，要演系个好大嘅挑战，同时对我演艺生涯好大帮助。事实系真嘅，你问我，以前嘅剧本我都觉得有需要调教，但今次我完全忠于原著，一丁点都冇郁过，仇强呢个人物好完整，我对于所有嘢都好有共鸣。 」
黄浩然口中的「挑战」，包括了增肥及展现老态，还要演一个懦弱小男人，「要增肥争20磅，要有中年𠮶种老态，我都攞我啲中学同学做蓝本，𡃁仔𠮶阵明明好瘦，而家有肚腩，要整吓整吓条皮带，我都刻意加咗少少小动作，其实系（参照）我同学 。」至于鲁文杰则演他的旧同学兼好兄弟，他说：「我几钟意剧本讲生活上发生嘅嘢，朋友间嘅感情。」而事实上，两人都确实是一对老拍档，黄浩然：「我同鲁文杰《巾帼枭雄2》（巾帼枭雄之义海豪情）𠮶阵已经合作，十几年喇，已经好耐冇合作过！但佢嘅舞台剧我有支持，佢全裸我有去睇！哈哈！但今次再合作真系好开心，以前嘅感觉返晒嚟，尤其啲抵死嘢，周家怡都话，你哋班友cut咗机都唔似cut机嘅！就系信任、轻松、放心。」
翻盘下半场｜与主角们的中年人生和应
龙文康表示，自己起初对破产题材不特别有感，但想深一层，却发现这个题材可以很阔，「ViuTV问我，有个破产嘅题材有冇得谂，但我谂破产其实就系人生嘅低潮。而家全球个情况，好似大家都破紧产，唔知要等几耐。」黄浩然亦表示，剧中的仇强，与自己有很多共鸣处，「我啱啱今年踏入50岁，踏入个5字真系好奇怪，突然觉得自己老咗好多！我做咗啲咩呢？会怀疑自己，有咩丰功伟迹呢？有时都会沉溺咗系一啲位置，但正正呢出戏提返我，有老友、有老婆有仔陪你一齐行。」鲁文杰：「剧入面有讲到我哋一班同学去殡仪馆。我自己现实中都有去，坐落去系有感觉，同学过身，我都咁上下喇㖞！会谂健康、仲有咩未做？有咩未试？」戏如人生，活像现实中的写照。
翻盘下半场｜鲁文杰曾自觉「冇用」
影视界正面对寒冬，台前幕后都面对缺乏工作、手停口停困境，而黄浩然亦不例外，「啱啱有部戏（《私家侦探》），有唔少人话几好㖞，做得唔错㖞，我话多谢，但而家冇戏开喇，所以系点样保持正能量。讲逆境，而家真系人生最逆境喇！就算疫情我都不断开紧剧，但讲真而家真系静。 」龙文康：「永远唔知道下个chance几时会无端端嚟。」所以黄浩然就身体力行，在空余时间做足准备，「今年年头我学返唱歌，好多人都唔知我初初入行签杜琪峰，其实系想出唱片！后来就摆低咗好耐。咁多年后我学返唱歌，又学戏、舞台剧嘅workshop去充实自己，到4月我就接到个舞台剧，原来所有嘢都对舞台剧好有帮助。学戏好多都系素人，大家话：『吓？你都嚟学？』我话系呀，想explorer下自己就要嚟学。」
至于活跃于舞台剧界的鲁文杰，更曾一度自我质疑，「我真系有中年危机，有一次我同白只去饮嘢，觉得自己喺舞台界冇乜用，仲可以做到乜嘢？好彩托赖，之后都有人揾，结论系唔好谂咁多，唔好沉醉喺负能量入面，做好自己，啲好嘢就会返嚟。」而龙文康则指：「可能我本身就唔系咁享受安逸，如果唔系已经入咗电视台安安定定咁做，我觉得自己唔适合。个世界已经唔同咗，我就要揾个可能性同埋生存，系要寻找。仲有咩想讲？用咩形式去讲？」既选择踏出舒适圈，就要努力寻找机会。
翻盘下半场｜黄浩然：我都翻盘啦
黄浩然经常饰演正气角色，但他老实表示，从前的他生人勿近，尤其是赶拍剧、工作中的自己，「以前我好钟意做主导，理埋人哋嘅嘢，我觉得𠮶样嘢啱，就唔会理其他人感受。但今次我完全放手，净系理自己嘅部分。讲真我开咁耐工，都冇试过老婆会话：『你开完工咁正面嘅？好多嘢分享！』我都唔觉嘅，但呢个戏畀到好多好嘅回忆我。我都慢慢转变，以前嘅我畀到人好大压力，而家都学，唔好要人咁辛苦，自己都换个角度睇事物。」他更笑指，连拍档周家怡都感受到他的改变，「做咗咁多年衰人，都做返好人啦！我都翻盘啦！家怡都话：『你都唔系衰人嚟嘅，你都系想件事好啫，不过你用嘅方法错咗！』讲真，而家只系想任何人都开心，真系呢几年开始追求嘅嘢。 」想不到戏外的黄浩然，一样在人生下半场决心翻盘。
