79歲Joe Junior自爆喺TVB畀人蝦：有啲導演扮晒嘢 因一事被當眾狂鬧 忍氣吞聲費事嘈
發佈時間：20:00 2025-08-23 HKT
屹立歌壇逾半世紀的Joe Junior（羅利期）在60年當過酒樓駐場歌星，做過英文樂隊成員，曾因翻唱《Here's a heart》連續七周高踞流行榜榜首兼銷量達二萬張，被譽為「香港60年代樂壇寵兒」。直到1997年，Joe Junior從美國回流返港加入TVB做演員，曾因在神劇《天與地》演「Dr. Dylan」一角而廣為人知。
Joe Junior入行係食咗好多苦頭
Joe Junior日前接受好友楊紹鴻的YouTube節目《小鴻吹水站3》，明年除了是Joe Junior的80歲生日外，亦是他入行60年的大日子，回望過去，Joe Junior坦言覺得感恩：「我入行係食咗好多苦頭，試過畀人篤住面與口與鼻，不過我面皮厚，搵食啫，我聽天由命，最大得着咪搵到個好老婆。」
相關閱讀：Joe junior老婆激罕露面 大排筵席群星到賀紅寶石婚 太太曾任夜總會舞蹈員一度小產至今未有子女
Joe Junior冇諗過做主角
Joe Junior加入TVB後演出不少劇集，在節目上，他直言：「我冇諗過做主角，或者做乜嘢特別嘅配角，又或者拎乜嘢獎，我邊度夠人叻，總之TVB咁多監製，每一個監製畀兩集我就夠，我唔係謙虛，係事實，我真係唔夠人叻， 我識中文，人哋嘅中文叻過我，我學到拍戲，但我會睇人哋拍戲叻唔叻，因為我哋睇鬼佬咁講『action speak louder than words』，有時望吓你，已經知你做咗戲，我最重要係出嚟，人哋鍾意睇我就算。」Joe Junior還說：「我經歷咗太多嘢，唔需要認叻，我根本就唔係叻， 人哋都係讀大學、訓練班出嚟，我唔係，我睇好多戲，甚至而家外國片、50年代嘅西片、周星馳、乜嘢大哥嘅戲，我都係睇完學人哋嘅演技，慢慢去學。」不過Joe Junior曾被TVB導演當眾怒罵：「我試過明明讀熟晒個劇本，點知埋位NG咗幾次，有啲導演扮晒嘢，走出嚟鬧我有冇睇劇本，我咪話對唔住，今日有少少瞓得唔好，我都費事嘈，由佢威囉，咪由佢鬧，叻得去邊呀。」
Joe Junior入行最大得着娶到好老婆
不過對於Joe Junior而言，入行最大得着當然娶到好老婆：「嗰陣我喺海城酒樓夜總會唱歌，佢嚟跳中國舞，我哋見到傾吓偈，呢個女仔睇落內在美同外在美，最終我哋拍咗7年拖，帶佢見老竇話娶佢做老婆一流。我哋海城酒樓擺酒，我叫老板唔好收我咁貴，佢話已經好平，已經畀咗面。我唔係好有錢，沉默是金，自己做好自己, 有苦自己知，有錢自己知，總之我冇問人借，做好自己本分。我娶佢嗰陣係唔夠錢，點知擺完酒後，禮金賺咗，夠錢去日本度蜜月，仲可以帶埋外母一齊去。 」至於夫妻相處之道，Joe Junior說：「未娶佢之前，唔係誇張，我有很多女朋友，但個個都是拖吓手仔、打招呼， 不過女朋友還女朋友，老婆娶咗返嚟就要錫佢。」
相關閱讀：70年代殿堂級歌手吸金力驚人 月入5位數兼多女埋身 曾因一首禁歌毀形象：傷害得好緊要
