75歲黎彼得「徵婚」後有女埋身：仲寄埋相嚟 網民憂變何伯 對夏韶聲道歉認過咗火
發佈時間：16:55 2025-08-03 HKT
75歲填詞人黎彼得早前在YouTube節目《玖噏秘笈》評論樂壇生態時，談及近日開紅館演唱會的夏韶聲「最紅嗰陣又唔見佢開演唱會」，表示不明白夏韶聲開演唱會的決定。夏韶聲事後被傳媒問及此事，明寸黎彼得「未夠班」，兩老隔空「對戰」掀起熱議。日前黎彼得就言論拍片回應，用「大哥」來稱呼比他年輕幾歲的夏韶聲，並向對方道歉：「真係過咗火！」亦分享「徵婚」後有桃花！
黎彼得稱呼夏韶聲「大哥」
黎彼得表示得知評論幾句夏韶聲的演唱會鬧成熱話都好驚訝，他否認為流量而發言，並透露拍片當日剛出院幾天，因此狀態不佳，而且拍片前沒有fact check，直認準備不足。他說：「我真係亂嗡，唔好意思，唯有同Summer大哥講，真係對唔住呀！竟然係叫得我做阿叔，我都真係好慚愧，雖然可能我大你幾日，不過算啦……咁你就話我唔夠班講你，咁事實係，我真係唔夠班，尤其是Band sound個領域，我係完全唔夠班，我簡直係『門外漢來看門外漢』，我簡譜都唔識睇，又唔識任何樂器，咁喺Band sound入面我憑咩夠班呢！」
相關閱讀：黎彼得終為37歲仔還清卡數 子曾於內地升學畢唔到業返港「躺平」 為子諗後路：申請公屋囉
黎彼得自認非完全未夠班
但黎彼得自踩一輪後，舉一例子為自己挽回少許面子，他說：「但我衰極喺CASH大會度都攞咗個終身成就獎，咁頒獎畀我嗰位啱啱過咗世嘅蔡瀾先生，叫做對個樂壇有少少貢獻啦，又不至於話完全唔夠班嘅。」黎彼得表示現時已不是藝員，已經離開電視界，只是一名普通市民，他面對批評抱「無所謂」心態。
相關閱讀：夏韶聲寸爆黎彼得未夠班 回應被指「開咩演唱會」 稱對方「阿叔」：佢未夠級數同資格評我
黎彼得稱沒有稱他人「畜牧」
黎彼得表示多謝夏韶聲為他講說話，提到黎彼得的言論可能是指桑罵槐，他說：「例如話咩『阿豬阿狗都開演唱會』，咁阿豬阿狗又唔代表話人係畜牧嘅，呢個觀點與角度啫！」黎彼得表示自知「串嘴」，表示早年在《歡樂今宵》已被何守信改名為「串黎」。他說：「冇辦法，自己性格就係咁，把死人口又唔收，因為讀得書少，表達能力差啲，有時就得罪人多，稱呼人少，我都唔想。但有時啲老友就畀面我，容忍我，好多時都畀位我過，我好感激佢哋。」黎彼得最後再向各位受影響人士道歉：「原諒吓啦，幾十歲算吧啦！」
相關閱讀：前TVB男星斥阿豬阿狗又搞演唱會 點名4天王呻樂壇唔健康 聞夏韶聲開騷：做咩演唱會啫
黎彼得回應「徵婚」
早前黎彼得表示希望學李龍基找位女伴照顧自己，但他否認想「徵婚」，表示：「我都應該屙尿照吓自己個樣。」他自踩無車無樓而且很多病痛，不過他指發言後有女士寄相給他自薦，「真係有兩位女士打電話嚟，有位仲寄埋相嚟添，變咗係佢哋徵婚，就唔係我徵婚，咁我都覺得與有榮焉。最近我去茶餐廳食飯，無端端同我打招呼，又笑吓咁啦，以前冇。可能佢哋睇完個節目心諗，自量吓啦！」有網民提醒他與突然示好的女士保持距離：「Peter哥，小心變何伯呀！」
相關閱讀：75歲前《愛回家》男星徵婚 首爆40年前因病離婚被拋棄 眼紅李龍基想搵伴：性生活已經唔關我事
