林盛斌Bob千年道行一朝喪 慘遇世紀騙案考慮報《東張》：黐鬼線真係好癲

入行20年的「娛圈吸金王」林盛斌（Bob）向來以轉數快兼醒目而稱，多年來深受客戶的歡迎，接Job類型包羅有，而且還是圈中知名的藝人、演員、主持、娛樂公司老闆，曾被圈中好友爆身家過10億。不過林盛斌今日在FB和IG出post，自嘲「千年道行一朝喪，出嚟撈咗20年，第一次遇上呢啲點估都估唔到嘅劇情。」

林盛斌做代言人拍廣告搞到要報《東張》

為免再有人中招，林盛斌坦言事件確實要報《東張》。事緣林盛斌早前接到單job，有一位自稱喺老人院負責行政的「李先生」，希望找林盛斌做代言人拍廣告，他的經理人Karman與「李先生」傾好報價和合作方案後，本來打算到老人院視察實質環境兼傾拍攝內容，到達老人院被接待處職員告知： 「李生？邊個李生？我哋呢度冇呢個人。」 事件惹來中好友們的討論。

林盛斌千年道行一朝喪經過全文如下：

呢件事，其實係要報東張嘅。
話說早兩個禮拜之前，我經理人Kaman收到個查詢，
對方李先生send咗張卡片過嚟，
話係旺角一間老人院嘅負責人，
對上仲有個院長，佢自己係第二把交椅，負責行政，
佢話佢哋想搵我做代言人拍廣告，做吓宣傳，
仲想我哋棋人做埋廣告公司去幫佢喺唔同媒體落廣告，
然後Kaman同佢溝通咗好幾次，感覺都正常嘅，
跟住大家傾到代言人價錢同埋詳細嘅工作內容，
專登約埋個電話會議，我同對方直接溝通落實，
咁Kaman仲好畀心機咁做咗一份合作建議書，
分析埋畀佢知唔同媒體廣告嘅報價同效用，
亦都寫到好清楚喺代言人期間我會做啲乜乜乜，
最後大家決定去馬，好開心，job confirmed！
如果大家認識我個經理人Kaman，
都知道佢係一個好上心、好有交代、好有交帶嘅人，
佢為咗確保所有嘢妥善處理同埋順利執行，
佢約咗客戶、我、廣告導演上星期五下晝三點開會，
因為Kaman想喺拍廣告同影宣傳相之前大家見一見面，
順便睇睇佢哋老人院實質環境，兼傾一傾個拍攝內容，
等大家可以好好準備同規劃之後嘅工作。
到咗上星期五下晝2:55 ，我哋去到呢間老人院門口，
Kaman就打電話畀呢位李先生話畀佢知我哋到咗，
然後對方話：
「唔係約咗聽日咩？我啱啱出咗去，半個鐘後先返。」
咁唔緊要啦，半個鐘啫，冇所謂嘅，收咗線之後，
我哋就入去老人院嗰度諗住坐低等佢返嚟。
好啦，高潮嚟啦……..
入到去，我哋同接待處個職員講話我哋約咗李生開會，
然後個職員就黑人問號：
「李生？邊個李生？我哋呢度冇呢個人。」
吓！
跟住有位女士行咗出嚟，佢叫林主任，佢同我哋講，
原來過去呢段日子，呢個所謂嘅「李先生」，
已經用過唔同嘅名字、身份、卡片同資料，
利用佢哋老人院嘅名義去訂唔同嘅物件同貨品，
甚至搵啲裝修公司話老人院要維修quote價，
又試過book咗一個按摩師上到去話幫啲老人家按摩，
林主任話呢張卡片嘅內容有啲係真，有啲係假，
同埋其實之前佢哋已經報咗警，備咗案，
喺呢個時候，Kaman不斷打電話畀呢個李先生，
對方已經冇再聽電話，冇任何回覆。
呢一刻，我哋幾個人，進入咗懷疑人生嘅狀態。
真係千年道行一朝喪，出嚟撈咗20年，
第一次遇上呢啲點估都估唔到嘅劇情，
喺度奉勸咁多位幕前同行，包括經理人同助手，
原來呢個世界上真係會發生呢啲咁荒謬嘅事。
我估一定會有人話：
「下次收到卡片，都上網查吓間公司同埋電話係咪真，
又或者打去人哋個總機度，check吓有冇呢個人囉！」
講真，事後孔明就梗係容易啦，我都諗到啦，
但係當每日都會收到唔同渠道嘅工作查詢，
又真係好難個個都咁樣做，同埋如果真係打去，
對方又係真嘅，又會搞到件事好怪同好尷尬。
雖然我唔知道呢啲算係騙案定係惡作劇，
亦都唔知道點樣可以叫大家小心避免呢啲事，
總之，就係要執生啦，唉，黐鬼線！
呢單嘢，真係好癲。

相關閱讀：Bob林盛斌撞樣南京「紅姐」？對比照惹人爆笑 自誇魅力尖沙咀排到上廣州：想媾邊個多啲

林盛斌經歷曾有圈中人中招

原來林盛斌這個經歷在圈中亦曾有人中招：「呢單嘢喺兩三個禮拜前喺《口水多過浪花》余迪偉都有講過，遭遇同你有九成一樣。」林盛斌回覆：「係呀，我哋兩個經理人分別都係收到呢啲嘅事。」還有人說：「呢個李先生係騙案，喺商界商會好出名，keep住用幾個唔同嘅藉口周圍呃人，其中一個係幫學校訂50張床褥。」、「呢個係騙徒釣魚嘅方法，例如叫裝修師傅入錢買材料，話俾佢知佢有個相熟供應商，但係院長同佢唔啱，所以叫裝修師傅代佢入錢之後回返畀佢。我估計騙徒之後會搵好多藉口叫Kaman入錢畀佢。不過可惜Kaman太細心，佢未出招就已經畀你哋踢爆咗。」

林盛斌曾叫幫手買電動輪椅

前《東張》主持容媛羨更說：「記得我喺《東張》嘅時候已經有報過呢單嘢，估唔到佢都冇停過繼續咁呃人！但係真係唔明，佢其實有咩實則好處？」接着再有人說：「之前係扮培正中學林主任幫老人院訂床褥，而家改咗名叫李生，如果無實質被騙錢，報警都無用因為日日都太多，個警察都聽到識背。」；「我公司7月中都收到呢啲電話（但係佢係扮學校主任打嚟話要訂10萬蚊貨），我老細又係同佢傾咗幾次，後來發現有啲奇怪，之後我同事係打咗去嗰個學校問，最後發現根本冇呢個人。」亦有人質疑這個「李先生」的動機，林盛斌就說：「我都唔知呀，咁中間佢都有叫我經理人幫手買電動輪椅。」

相關閱讀：林盛斌Bob大學鮮肉片出土 濃密頭髮前所未見 大爆本飾演周星馳《少林足球》呢個角色