林盛斌Bob千年道行一朝丧 惨遇世纪骗案考虑报《东张》：黐鬼线真系好癫

入行20年的「娱圈吸金王」林盛斌（Bob）向来以转数快兼醒目而称，多年来深受客户的欢迎，接Job类型包罗有，而且还是圈中知名的艺人、演员、主持、娱乐公司老板，曾被圈中好友爆身家过10亿。不过林盛斌今日在FB和IG出post，自嘲「千年道行一朝丧，出嚟捞咗20年，第一次遇上呢啲点估都估唔到嘅剧情。」

林盛斌做代言人拍广告搞到要报《东张》

为免再有人中招，林盛斌坦言事件确实要报《东张》。事缘林盛斌早前接到单job，有一位自称喺老人院负责行政的「李先生」，希望找林盛斌做代言人拍广告，他的经理人Karman与「李先生」倾好报价和合作方案后，本来打算到老人院视察实质环境兼倾拍摄内容，到达老人院被接待处职员告知： 「李生？边个李生？我哋呢度冇呢个人。」 事件惹来中好友们的讨论。

林盛斌千年道行一朝丧经过全文如下：

呢件事，其实系要报东张嘅。
话说早两个礼拜之前，我经理人Kaman收到个查询，
对方李先生send咗张卡片过嚟，
话系旺角一间老人院嘅负责人，
对上仲有个院长，佢自己系第二把交椅，负责行政，
佢话佢哋想揾我做代言人拍广告，做吓宣传，
仲想我哋棋人做埋广告公司去帮佢喺唔同媒体落广告，
然后Kaman同佢沟通咗好几次，感觉都正常嘅，
跟住大家倾到代言人价钱同埋详细嘅工作内容，
专登约埋个电话会议，我同对方直接沟通落实，
咁Kaman仲好畀心机咁做咗一份合作建议书，
分析埋畀佢知唔同媒体广告嘅报价同效用，
亦都写到好清楚喺代言人期间我会做啲乜乜乜，
最后大家决定去马，好开心，job confirmed！
如果大家认识我个经理人Kaman，
都知道佢系一个好上心、好有交代、好有交带嘅人，
佢为咗确保所有嘢妥善处理同埋顺利执行，
佢约咗客户、我、广告导演上星期五下昼三点开会，
因为Kaman想喺拍广告同影宣传相之前大家见一见面，
顺便睇睇佢哋老人院实质环境，兼倾一倾个拍摄内容，
等大家可以好好准备同规划之后嘅工作。
到咗上星期五下昼2:55 ，我哋去到呢间老人院门口，
Kaman就打电话畀呢位李先生话畀佢知我哋到咗，
然后对方话：
「唔系约咗听日咩？我啱啱出咗去，半个钟后先返。」
咁唔紧要啦，半个钟啫，冇所谓嘅，收咗线之后，
我哋就入去老人院𠮶度谂住坐低等佢返嚟。
好啦，高潮嚟啦……..
入到去，我哋同接待处个职员讲话我哋约咗李生开会，
然后个职员就黑人问号：
「李生？边个李生？我哋呢度冇呢个人。」
吓！
跟住有位女士行咗出嚟，佢叫林主任，佢同我哋讲，
原来过去呢段日子，呢个所谓嘅「李先生」，
已经用过唔同嘅名字、身份、卡片同资料，
利用佢哋老人院嘅名义去订唔同嘅物件同货品，
甚至揾啲装修公司话老人院要维修quote价，
又试过book咗一个按摩师上到去话帮啲老人家按摩，
林主任话呢张卡片嘅内容有啲系真，有啲系假，
同埋其实之前佢哋已经报咗警，备咗案，
喺呢个时候，Kaman不断打电话畀呢个李先生，
对方已经冇再听电话，冇任何回复。
呢一刻，我哋几个人，进入咗怀疑人生嘅状态。
真系千年道行一朝丧，出嚟捞咗20年，
第一次遇上呢啲点估都估唔到嘅剧情，
喺度奉劝咁多位幕前同行，包括经理人同助手，
原来呢个世界上真系会发生呢啲咁荒谬嘅事。
我估一定会有人话：
「下次收到卡片，都上网查吓间公司同埋电话系咪真，
又或者打去人哋个总机度，check吓有冇呢个人啰！」
讲真，事后孔明就梗系容易啦，我都谂到啦，
但系当每日都会收到唔同渠道嘅工作查询，
又真系好难个个都咁样做，同埋如果真系打去，
对方又系真嘅，又会搞到件事好怪同好尴尬。
虽然我唔知道呢啲算系骗案定系恶作剧，
亦都唔知道点样可以叫大家小心避免呢啲事，
总之，就系要执生啦，唉，黐鬼线！
呢单嘢，真系好癫。

相关阅读：Bob林盛斌撞样南京「红姐」？对比照惹人爆笑 自夸魅力尖沙咀排到上广州：想媾边个多啲

林盛斌经历曾有圈中人中招

原来林盛斌这个经历在圈中亦曾有人中招：「呢单嘢喺两三个礼拜前喺《口水多过浪花》余迪伟都有讲过，遭遇同你有九成一样。」林盛斌回复：「系呀，我哋两个经理人分别都系收到呢啲嘅事。」还有人说：「呢个李先生系骗案，喺商界商会好出名，keep住用几个唔同嘅借口周围呃人，其中一个系帮学校订50张床褥。」、「呢个系骗徒钓鱼嘅方法，例如叫装修师傅入钱买材料，话俾佢知佢有个相熟供应商，但系院长同佢唔啱，所以叫装修师傅代佢入钱之后回返畀佢。我估计骗徒之后会揾好多借口叫Kaman入钱畀佢。不过可惜Kaman太细心，佢未出招就已经畀你哋踢爆咗。」

林盛斌曾叫帮手买电动轮椅

前《东张》主持容媛羡更说：「记得我喺《东张》嘅时候已经有报过呢单嘢，估唔到佢都冇停过继续咁呃人！但系真系唔明，佢其实有咩实则好处？」接着再有人说：「之前系扮培正中学林主任帮老人院订床褥，而家改咗名叫李生，如果无实质被骗钱，报警都无用因为日日都太多，个警察都听到识背。」；「我公司7月中都收到呢啲电话（但系佢系扮学校主任打嚟话要订10万蚊货），我老细又系同佢倾咗几次，后来发现有啲奇怪，之后我同事系打咗去𠮶个学校问，最后发现根本冇呢个人。」亦有人质疑这个「李先生」的动机，林盛斌就说：「我都唔知呀，咁中间佢都有叫我经理人帮手买电动轮椅。」

相关阅读：林盛斌Bob大学鲜肉片出土 浓密头发前所未见 大爆本饰演周星驰《少林足球》呢个角色