真相猜‧情‧尋丨丁珮回應世紀謎團 親揭隱瞞李小龍死亡地點真相 直指謠言非常幼稚：全世界妒忌我

由方東昇、黃曉瑩、李嘉嘉擔任主持的TVB節目《真相猜‧情‧尋》7月23日播出第三集，打頭陣播出的「李小龍猝死之謎」首播後，在網上製造了不少熱話。 今集被譽為「可能是世界上最接近真相的人」的關鍵人物丁珮，激罕現身接受專訪，親解李小龍死亡之夜謎團。

丁珮讚李小龍是「很有魅力的人」

久違丁珮風采依然，她在節目上直言：「有人講我一生嘅故事精彩，連劇本都寫唔出，太假。」她盛讚李小龍是「很有魅力的人」：「成個世界都鍾意佢，我唔鍾意佢都唔正常啦，佢鍾意我，覺得我哋有緣，或者情人眼中出西施，人哋覺得我唔好，佢覺得我好。」

相關閱讀：真相猜‧情‧尋丨「小龍女」丁珮激罕現身親解李小龍死亡之夜謎團 連環拋金句親訴二人關係 

丁珮坦承李小龍鍾意她的品味

丁珮在節目上先剖白與李小龍的關係：「我冇乜讀書，又唔係靚女，不過我唔覺得自己一無是處，除咗我覺得自己個人心地好，唔講大話，好直接，佢成日都話我心地好，人好爽快，總之覺得我好好。」問到當初如何認識？丁珮說：「咁梗係佢追我喇，唔通我追佢呀？《猛龍過江》佢嘅頭髮係我帶佢去剪，識咗佢之後，佢啲衫係我幫佢揀，因為佢鍾意我嘅品味，佢識咗我之後，比以前靚仔咗好多，所以佢哋喺背後叫咗我做『小龍女』。」當年李小龍在丁珮家中猝逝，多年來丁珮是外間認為是少數仍然在世的關鍵人物，重提50多年前李小龍猝逝的一晚，丁珮在事發後兩周錄的口供，提到李小龍在當日下午5時到達她的家中，大大約7點頭痛，吃了丁珮給的止痛藥入了丁珮的房瞓覺，小休後到餐廳會合鄒文懷和會合外國朋友。

丁珮未有想過李小龍會死

丁珮在節目上說：「梗係畀佢瞓，我咪喺廳睇電視，鄒文懷打嚟問我哋係咪嚟，我咪細細聲叫佢，佢冇反應，我咪打畀鄒文懷話佢冇反應，鄒文懷咪話即刻返嚟。」大約9時45分，鄒文懷到達丁珮心家中「叫唔醒」李小龍，10時便由丁珮的私人醫生召救護車將李小龍送院，丁珮被問為何未有第一時間叫救護車？她說：「佢（鄒文懷）話要等佢返嚟，我一個人都唔知點，佢都要知發生乜嘢事，因為李小龍之前有昏迷過，但係我哋唔知，佢係有醫生睇佢，鄒文懷做嘅事都係啱，點知搵唔到佢嘅醫生，而我嘅醫生就喺隔離嘅浸會醫院，我哋call醫生嚟救佢，點會諗到佢死咗呢？醫生嚟咗先話危險，永遠都唔會諗到一個『死』字，點會諗到佢死呢？」丁珮又說：「佢（鄒文懷）考慮多啲就係啲人點知，但人算不如天算。」

丁珮認鄒文懷指示不要提李小龍曾到訪她的家

事後有傳媒查出李小龍由丁珮家中離開，二人的地下情曝光，丁珮由最初否認李小龍在自己家中昏迷，到後來與鄒文懷改口指李小龍來傾劇本，丁珮解釋：「鄒文懷走嘅時候講，Betty啊你唔好講李小龍喺你屋企送去醫院喎。」當年丁珮的口供亦提到是按鄒文懷的指示：「鄒文懷話叫我唔好講，係屋企人嘅意思，咁我都明白，唔想我講唔通我話一定要講？我梗係要尊重佢哋屋企人嘅意見。」當知道李小龍離世，丁珮坦言驚多於傷感：「除咗因為唔知發生乜嘢事好驚，仲有乜感受？我都唔知係咪一片空白，嗰陣我得26歲。」自此丁珮淪為眾矢之的，談及當年的種種傳聞，她直指謠言非常幼稚：「我都唔知好嬲定好笑，啲人話我畀咩毒藥佢食，真係乜嘢謠言都有，往生仲講得好難聽，話佢食乜嘢春藥，乜嘢『西班牙蒼蠅』，我一生都冇聽過呢啲。」丁珮還說：「呢個世界梗係妒忌我，因為得我一個人得到李小龍，我唔想得到佢，但係我得到佢。」

相關閱讀：真相猜‧情‧尋丨美軍調查李小龍死因真相曝光 傳記作者李志遠提出兩大疑點 丁珮終極現身釋疑慮

丁珮坦言事件困擾自己逾50年

當時死因庭的結論是李小龍的死，可能由於藥物敏感而引致腦水腫，丁珮說：「頭痛藥佢以前都食過，我同我阿媽都有食過，講句唔好聽，就算佢真係食頭痛藥而死，咁都冇辦法，頭痛藥又唔係我發明嘅，點解啲人一定要賴我？」丁珮坦言事件困擾自己逾50年：「所有嘢我都係被動，冇少少係主動。我自細好怕死又怕鬼，突然間有咁嘅事出現，我半閉關，唔想見人，同埋我都失去咗一個最鍾意我嘅人，我自己最鍾意嘅人。」丁珮亦留嚴重後遺症：「我睇到邊個瞓覺，咪睇吓佢有冇死，到而家都係。我覺得李小龍嘅死叫做善終，即係瞓覺往生，係最好嘅往生。」丁珮更由生不如死到學會「打不死」：「嗰陣啲人都想我死，我就同自己講，我點解要死？如果我死咗，啲人會以為我畏罪自殺。我冇做虧心事，就唔怕鬼敲門，『行得正；企得正』，佢嘅死就係我嘅生，佢唔死我冇今日，我唔會得道，唔會認識自己。我要報答佢，佢睇好我，我更加要做自己。」

李振輝提及李小龍身體好似18歲後生仔

今晚一集除了有丁珮專訪，還有三位重點被訪者，分別為香港首位藥物敏感醫生李曦、衞生署法醫科前主任顧問醫生潘偉明與及李小龍胞弟李振輝。李曦醫生及潘偉明資深法醫，將詳細分析李小龍的身體檢查報告，並會以累積多年的專業意見，推測真正死因！李曦醫生看完李小龍的驗屍報告和醫療記錄，加上其他人的描述，覺得李小龍不像是因急性藥物過敏而死：「佢應該好快有徵狀，或者冇咁快致命，佢都有機會去求救或者去講佢自己唔舒服。第二就係佢以前冇病史，但佢食過嗰個藥，雖然唔係話一定唔係藥物過敏，但第一次已經致命機會極少。第三就係解剖報告，我真係覺得如果佢真係因為藥物急切咁致命，應該氣管收窄機會極高，應該做解剖會見到個氣管有收窄，但佢就完全正常。反而有啲好唔常見嘅腦腫，所以我覺得又唔係好吻合藥物過敏嘅。」排除藥物敏感後，李小龍的爸爸及哥都是在睡夢中離去，曾有人提出會否與家族病因有關時，李小龍的弟弟李振輝則不認同：「李小龍喺1973年曾經返美國做身體檢查，有兩個醫生驗過佢身體，認為佢身體好似一個18歲嘅年青人咁，係完全冇問題。」

專家稱李小龍急性藥物過敏而死的機會很低

而資深法醫潘偉明與李曦的看法相同，認為李小龍急性藥物過敏而死的機會很低。李小龍當年5月時曾經發燒及嘔吐，有可能李小龍兩次出事就是「癲癇症」：「癲癇症可以解釋晒所有嘢，如果真係一個原發性嘅癲癇症，咁係有機會引致一個突然嘅死亡。」潘偉明還稱這一個原因，亦多數為睡眠中發生，所以就能解釋為甚麼沒有人發現他病發。當時李小龍在美國檢查時，醫生有處方止抽筋藥予李小龍服用，但沒法知道他有否按時服用，所以無法得知真正的死因。李小龍送院時，有救護員提及鄒文懷說過李小龍曾患「腦癇症」，鄒文懷在訪問上亦承認曾說過「李小龍似乎係發羊吊」，但當年驗屍報告向他是藥物敏感。有不願意透露身份的人士表示，有機會因為70年代的醫療水平仍未發達，還有可能是當時有人想保護李小龍的英雄形象，避免與腦癇症扯上關係，不過蓮達否認李小龍有這個病。