Ian與姜濤唱反調無懼拍拖脫粉 認內向不敢跟花姐Deep Talk 自揭同ViuTV合約「唔止3年」
發佈時間：18:45 2025-05-30 HKT
陳卓賢（Ian）今日（30日）到尖沙咀出席快餐店概念店開幕活動，吸引過百Hellossss（粉絲暱稱）到場，Ian表示最鍾意食朱古力味甜品，以心情去選擇甜度，又指食甜嘢令人開心，全天候都想食。Ian在下月生日，快餐店以雪糕代替蛋糕送給Ian，而現場的Hellosss亦隨即唱出生日歌。
Ian聞被告串謀詐騙罪不成立︰評論唔到
2022年MIRROR紅館演唱會發生意外，今日裁定3名被告串謀詐騙罪不成立，Ian受訪時表示事情過了法律程序，有法律程序自己評論不到，亦好難放個人觀點去講。久未露面的Ian身形明顯比之前大隻，他笑言是服裝效果，又說有去健身，而之前發燒了幾日瘦了不少。Ian將在下月6日開始在澳洲舉行兩場巡迴演唱會，他表示在4號出發，演唱會跟之前的歌單差不多，亦會唱一、兩首新歌，服裝上有點不同，務求每一站也會有驚喜及新鮮感帶給樂迷。
Ian將於下月9日32歲生日，他指首次在外國工作中過生日，到時可能會食雪糕獎勵自己；又說自己在戒口，很久沒有吃甜點，他指以往生日都沒有做甚麼去慶祝，會簡單與家人食飯，生日也會封利是及買禮物給媽咪：「我冇同佢講，有啲肉麻，呢一日係紀念佢好辛苦生我出嚟，所以唔係為我慶祝，係答謝佢！」他笑言因最近很忙，還沒有買禮物，故從澳洲返港後會即時去買，對於Hellosss為他舉行生日展，Ian稱還未到現場，要等待回港後夾到時間去，知道Fans很用心做了很多事情，有滿滿的愛，很感激她們。
Ian自爆合約「唔止3年」
另外，在MIRROR團綜《呂濤米Lo Seoul》中，隊友Anson Lo、姜濤、呂爵安及Jeremy與經理人花姐深情對話，Ian指準備巡迴而沒有追看，有看過網上片段，他笑言不知道自己拍時是否需要深情對話：「我呢啲內向內斂深情對話比較差，好少去剖白自己，做觀眾我睇吓係OK。」提到花姐在節目中有問他們的感情事，仲問姜濤為何還未拍拖，而姜濤就指太多人留意，覺得自己不適合拍拖，不過Ian就表示不會怕拍拖：「緣份天注定，緣份嚟自然會出現，但暫時冇，我哋都有成員拍拖，Fans都好支持，我覺得唔係一個好嚴重問題。我覺得相對，藝人拍拖就會被放大，（會唔會擔心？）我唔會收埋，（會脫粉？）大家會支持，大家對我哋嘅愛，係你開心我哋就開心，我好多謝佢哋。」
對於MIRROR合約只餘3年，Ian卻坦言自己不只3年約但保密實際年期，他解釋加入ViuTV前是簽另一間公司以co-management形式工作，「出道之後買返自己合約，再同公司renew，所以我係長過大家份約。」
Ian耐心等待另一半到來
問到生日願望是否想快點找個女友？Ian就指現專注工作，沒有這個諗法：「Tour橫跨咗好長時間，一路都好專心，工作先，緣份冇得強求，我相信出現嘅時候就會出現，耐心等待一下！」
