林盛斌搬買鹹碟𤓓事上台 自爆：戒買唔戒睇 跳上紅館開騷跟子華神同grade丨獨家
發佈時間：07:00 2025-02-14 HKT
45歲林盛斌(阿Bob)下月7日首次登上紅館大舞台舉行Talk Show《The Bobfather》，「升呢」跟黃子華、林海峰、許冠文、張達明同grade！化身「Bobfather」的阿Bob會分享由家庭、事業、人生𤓓事，少少鹹多多趣的自身經歷，傳播正面訊息。重提當年「最大災難」被影到買鹹碟事件，阿Bob自揭為免重蹈覆轍的樣衰已戒買唔戒睇，現在由連結中網站搵來歐美日韓正嘢來沉浸式享受！ 採訪：方騫平 攝影：羅安強
林盛斌入行22年，10年前在伊館舉行處男Talk Show《Bob’s Up》；6年後轉移九展Star Hall，喺3000人場地開了第2次的棟篤笑《The Bobfather》，其後移師歐美、大馬、內地巡演，尾站重返香港展開，並且跳入可容納7000觀眾的紅館演出，阿Bob形容好難得，不論在票房及內容上都會有壓力：「有時開車期間自言自語度稿，嚇到個女追問『爸爸做乜傻傻哋同自己講嘢？』」
人生不自量力求進
今次紅館騷是阿Bob人生里程碑，尤其見到紅隧口的大廣告牌，有說不完的快感，當問到會否感到好威時？阿Bob不否定：「呢個(威)唔單止係我一個人，要畀credit家人、團隊、fans、身邊陪住我成長嘅朋友。」可惜卻被網民嘲做人不自量力！對此，阿Bob不獨不介意被攻擊，反而轉化成正能量：「呢句係令我有好大啟發，其實係講得冇錯嘅，人生上我係做好多不自量力嘅嘢，打從由新城電台Sales開始，到轉職做DJ，我唔係有乜特別『墨水』，又唔係字正腔圓；到晉身電視台拍嘢，又唔係靚仔，只係恃住有少少主持天份，努力睇日韓、內地等綜藝節目嚟學習…我可以留喺舒適圈度做啲無難度嘅婚禮司儀，但我要求進步，呢啲不自量力成就咗我人生。」Bob因此訂立下個目標，希望今年能做一次TVB喜劇男主角，海報上企到C位！他還補充說：「可以係雙男主嘅，比如跟雙料『視帝』張振朗合作都好。」恨到出口的阿Bob更出埋口術：「希望曾總裁(曾志偉)、曾勵珍、樂易玲畀個機會呀。」
少鹹多趣有啲踩界
《The Bobfather》中內容不乏家庭篇及由出生到成長、工作等血淚史，包括在婚禮活動上婆媳間的所見所聞；還會以嬉笑怒罵式講到老婆黃乙頤（Pearl）生仔過程，他事先張揚：「部份內容會有少少鹹多多趣，故事既踩界又有共鳴。」另外，又會挖返啲𤓓事，分享被人以難聽花名攻擊的回應；甚至酒後鬧事、買「四仔」鹹碟等。被追問還有冇買鹹碟時？阿Bob亳不遮瞞只是戒買唔戒睇：「身邊朋友叮囑我唔好再買，佢哋畀連結我入去網站睇，入面搵來歐美日韓台等正嘢，隨個人喜好選擇睇有冇格仔，大細格仔都有…𠵱家唔使擔心，可以戴住耳筒喺床上沉浸式享受！哈！睇完同老婆講『嚟喇！』」阿Bob指老婆雖然唔會一齊睇，但唔介意他自己Enjoy。
大方送女兒安全套
對於16歲大女林霏兒帶男友回家拜年「見家長」一事，引來不少圈中好友爆笑留言，其中湯洛雯笑言：「入廚房收埋啲刀先。」朱智賢表示：「搵人綁住你對手。」戴夢夢也指：「收埋把鉸剪。」阿Bob卻笑笑口回應：「黐線！」不過，他坦言亦有向女兒男友做訓示：「我叫佢大個仔(同樣16歲)要有責任感，唔好做啲古靈精怪嘅嘢。」作為開明爸爸的Bob可有傳授囡囡性知識呢？阿Bob卻顯得有點避忌：「使鬼教咩！佢叻過我啦，唔好提呢啲，大個啲先啦。」最後不失搞笑本色說：「唔使花錢買袋(避孕套)，我櫃桶有幾包！」
