姜文杰多留港工作珍惜跟寵物相處時間 太太李泳淇拍廣告憶病逝愛犬爆喊丨獨家
發佈時間：08:00 2025-02-12 HKT
姜文杰（Benji）太太李泳淇（Rain）早前接拍寵物保險廣告，演技備受讚賞，日前兩夫妻帶同愛犬Nana受訪，Benji也讚Rain做得好，更透露因1年前愛犬Peanut突病逝，令他們傷心欲絕，Rain演出時亦憶起跟Peanut相處點滴。Peanut亦教識他們要及時去愛，Benji會多留港工作珍惜跟Nana相處時刻。採訪：杜杜 攝影：朱偉彥
Benji自小已愛跟寵物相處，由叔叔爾冬陞的家到父母家都有養狗，「細個時叔叔養咗5隻不同品種嘅狗，喺溫哥華時爸爸媽媽就養咗澳洲爹利Bobby同佢個仔Momo。」Bobby和Momo由Benji 10歲開始陪着他成長，亦是他首次見證寵物在眼前離世一刻，「Bobby 17歲先走，嗰時我爸爸唔喺加拿大，佢好乖，已經瞓喺度唔食嘢唔去廁所，等埋我爸爸坐飛機返嚟，一摸佢吐咗最後一啖氣走，後尾Momo有心臟病，12、13歲喺我隻上病發走，我第1次感受到屋企人走嘅震憾！」
愛犬幫手揀老婆
Benji返港發展後，主要在金魚街搵寵物， 曾養過魚、戰鬥甲蟲，烏龜和蠍子等，但因不懂技巧失敗居多，直到30歲時遇上Peanut，「朋友隻芝娃娃生咗幾隻BB，畀咗一對仔女我，仔就係Peanut，女畀Lesley（姜麗文）養嘅Jellybean。」Peanut是Benji首個「親生仔」錫到濃，開工亦會偷偷帶在身邊，揀老婆似乎亦愛牠影響，「嗰時都有拍吓拖，佢都冇當媽咪，直至到識到Rain，佢好似㨂定咗媽咪咁，同佢感情好好，會好黐佢好聽佢話，仲好似開始變咗心，聽佢話多過聽我。」而他們婚後Rain帶埋她養的Nana，「一家四口」生活。
Peanut在10歲時開始失明，2年後更突然病逝令Benji和Rain好傷心，早前Rain拍廣告時自然投入角色，「睇故事大綱已經眼濕濕，嗰時啱啱Peanut走咗1年，拍時當然諗起佢就好自然喊，一齊真係太耐，朝見口晚見面又一齊瞓，屋企人一樣。」Peanut走後令他們更珍惜跟Nana相處日子，Benji說：「個廣告都講得好啱，唔想再有遺憾，我除咗耳仔因壓力有少少問題，加上Nana都13歲想陪佢同錫佢多啲，揀工作都寧願留喺香港，唔想離開佢哋咁多。」
