羅啟豪慘被黑粉抺黑半年谷氣狂呻 被老屈掠水搵Fans笨兼人身攻擊丨獨家
發佈時間：07:00 2024-04-27
近日「姜神」Fans因接機霸位問題大打出手，搞到兩位偶像好頭痕，之前「鏡仔」Edan (呂爵安)及Alton(王智德)的FC又因內訌被逼停運。原來羅啟豪同樣受到fans事件困擾，幾位被逐的FC黑粉，因愛成恨，近半年在網上惡意狙擊他，直指他及FC掠水，甚至作出人身攻擊。一向少言的羅啟豪都忍唔住狂呻，更奉勸黑粉遠離佢：「唔開心嘅嘢唔好睇，無謂令自己更加唔高興。」採訪：方騫平 攝影：羅安強 場地：PMQ
《中年好聲音》季軍羅啟豪趁住出道一周年，推出處男原創歌《相信相信》，更邀得倫永亮作曲、周耀輝填詞，唱出參加歌唱比賽後成功克服社恐的心聲，希望能鼓勵同路人，只要相信就會夢境成真。
怕犯家規大學前禁粗口
回想當年社恐嚴重時期，羅啟豪睇過心理醫生及接受催眠治療，但狀況更差，行一步退兩步，完全幫唔到手：「最記得8歲時媽媽叫我喺宴會上，對住幾百位uncle、aunie唱歌，我匿喺枱底驚到想死，父母都冇我辦法。」他相信性格內斂跟家庭因素有關：「父母喺我成長過程中特別注重禮儀，尤其餐桌上，屋企人講嘢斯文有禮，亦唔識得嬲人及鬧人，以前經常被朋友利用。由於講粗口係犯家規，所以讀大學後才敢講粗口發洩情緒。」
黑粉斥FC掠水消費歌迷
正當「豪吧」(歌迷會)成立一周年，唔識得嬲人的羅啟豪都俾黑粉激到有啲火，不吐不快：「有幾位犯咗規俾Admin踼出會嘅『豪殼』(fans)怪我冇出聲，所以發脾氣怒剪會服後，呢幾個月keep住用10多個假帳戶，喺網上群組瘋狂出po抹黑我及Admin負責人，唱我哋掠水，指《相信相信40+1音樂會》$680門票太貴；又彈製作電子MV書送畀DJ做宣傳係搵Fans笨，消費歌迷啲錢…就算呢年來FC營運得有聲有色，仍被針對攻擊，留言忠告『中2生』唔好將FC搞成『豪吧』咁。」羅啟豪呻到停唔到，「仲會轟我經常將社恐話題掛喺口邊，留言『你唔悶我都悶啦！』又踩多一腳斥我唱歌得一個tone好悶，被形象相似嘅譚輝智揮低、甚至挖埋皮膚病嚟講。」
望跟輝智組兄弟班切磋
啟豪澄清其實「豪吧」從冇收會費，「豪殼」係可自由選擇參與活動。不過，嬲嬲豬嘅啟豪忍唔住為真歌迷發聲：「我啲Fans好高質，佢哋從來唔會抨擊戰友，大家互相扶持，唔會比較。」他坦言見到惡意中傷會唔開心及心痛，只能提醒自己盡量做好本分，唔好受到影響，更有感而發：「因為呢類人，令到有啲FC都要停運，其實經營FC係唔容易嘅事，只要大家對Admin肯包容多啲，會好好多。」對於Fans爭風呷醋，他無奈笑說：「可能呢個只係頭盤，𠵱家仲要好好學習。不過，既然黑粉咁唔鍾意我，奉勸佢哋搵鍾意嘅歌手嚟支持，人生有咁多煩惱，唔開心嘅嘢唔好睇，無謂令到自己更加唔高興。」談及「中2生」出道，啟豪坦言會分薄機會，唯有自製機會：「希望組成『靦腆兄弟』，跟背景相似嘅譚輝智切磋吓，輝智好勁，適應力比我更快。」
《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
緊貼最新最快新聞資訊，請立即下載星島頭條App：https://bit.ly/3Q29Vow
