獨家丨《全民造星V》終極十強名單流出 大熱Adams 樂庭被Foul香港參加者佔七位
發佈時間：07:00 2023-06-08
ViuTV選秀節目《全民造星V》第二回合本周一展開，藍組導師韋羅莎﹑馮允謙及紅組導師陳蕾﹑陳健安各揀選30位參賽者共60強以小組形式對決。上周四，本報已獨家披露真實情況是十強已誕生，總決賽將於七月舉行。《星島頭條》收到終極十強名單，獲評判高度讚好，導師又甚喜愛的49號Adams及有姜濤2.0稱號的96號樂庭大熱倒灶，美加及馬拉各有一名代表入十強，與香港參加者及台灣代表3號Snoopy (詹仕偉)瓜分十強名額。當中有4名藍組成員，紅組就有6名，成績咁好，陳蕾同安仔應該開心到爆喊。撰文:金泰亨
周二晚繼續第二回合小組對決，在Dance Battle中，賽前被睇高一線，由KC領軍，Snoopy、Meow、阿O、阿生及希晉的紅組竟然落敗，再要背負兩個淘汰名額。評判Grace直指陳蕾深愛的阿O唔掂：「甩得都幾犀利，其實呢個係你責任，人哋練5小時，你要練10小時，跳舞冇得呃人，嗰一刻冇人幫到你㗎﹗」阿O隨即爆喊自責，其實討論區有大量留言，均指阿O舞技、樣貌及身形唔出眾，唔明陳蕾點解死攬。
開心亨仔跑到尾
不過，各位網民可以放心，十強名單中冇阿O的名字，亦唔見死唔斷氣的Moley。至於流出的十強名單，被指本屆親生仔的大熱99號KC (黃家灝)、民選冠軍，深受網民喜愛，來自美國的9號Lyman Heung (香胤宅) 及憂鬱靚仔，未選已獲拍Winka MV資格的2號Nathan (魏念恩)入圍無懸念，加上好跳得的1號王鋒、爆燈入圍，19歲的RAPPER 6號Taco (黃泓祖)、感性又唱得的大隻仔，32號亨仔 (陳鎮亨)都有份。
暫時未見突出，堪稱爆大冷入圍者，包括擅跳Popping，28歲個但樣好成熟的跳舞老師， 35號Tsoul (田曜誠) 、46號希晉 (王希晉)及馬拉代表52號Ash(盧信宥)。至於同樣深受觀眾喜愛的49號Adams及96號樂庭則無緣入十強。
《星島頭條》新網站有更多精彩內容：http://www.stheadline.com/
