獨家丨細細粒急瘦殘爆響警號被王祖藍捉入減肥營 靠通穴位練飲水一周搣走20磅

更新時間:07:00 2023-06-02
發佈時間:07:00 2023-06-02

10年前體重高達260斤(286磅)的陳嘉佳(細細粒),近年轉型做吃播KOL愈撈愈掂,每月平均做12次,每次直播都大飲大食,例如鯨吞5人份量日本菜,或食200串串燒,相當唔健康。近日她被網民發現面容憔悴現身浙江路邊攤,幼腳跟圓潤身形唔啱比例,健康狀況令人擔心。細細粒接受《星島頭條》獨家訪問,自爆老闆王祖藍好擔心佢健康,上周脅逼她入住減肥營,一周已搣走近18斤(19.8磅)贅肉,最新體重182斤(200.6磅)。採訪:方騫平

細細粒為搵食,試過一日食足9餐,零食、飯餐、甜品樣樣齊,幸好身體冇大礙。她向《星島頭條》報平安指:「咁我仲後生,暫時未有『三高』同埋心血管疾病,但難保將來會有,所以食播以外盡量唔食嘢,做吓運動,加上工作太攰,其實近年體重自動回落到200斤(220.4磅)。」

入營費需4萬「人仔」

雖然體重回落,但兩老闆王祖藍及彪哥仍然覺得唔夠,所以上月出錢拉咗細細粒入減肥營:「老闆好關心公司肥人嘅健康問題,佢Group埋13個肥人,上月21至28日齊齊入住佢哋朋友喺福州嘅一間別墅,營友中只有兩個好似我咁身形,其他只有少少肉地,不過,勝在可以互動鼓勵吓,餓及悶都可以堅持落去。每位營友要畀4萬蚊人民幣入營費,都算幾貴,但由老闆幫我支付。」

細細粒讚好老闆王祖藍好關心員工。
細細粒讚好老闆王祖藍好關心員工。
細細粒以做吃播大受內地網民歡迎。
細細粒以做吃播大受內地網民歡迎。

頭4日餓到發脾氣

談及入營體驗,細細粒覺得辛苦得嚟都幾有趣:「主力係調理身體,食少啲畀內臟休息,仲要早晚按摩半小時打通穴位經脈,排走五臟六腑毒素,所以完全唔使做劇烈運動,連行街都怕會破氣,最多只係做啲拍吓手臂、大髀嘅伸展動作。」飲食方面固然要食得清淡,澱粉質及糖全斷,以蔬菜、烚蛋及無糖豆漿為主,自爆頭4日餓到發脾氣,好不爽,不過,首3日已快速減咗14斤(15.4磅)。

提及日程,她指營友早上9點集合食早餐及做按摩,12時食午餐及午睡,下午5點食晚飯及按摩,晚上9點半要上牀休息,期間會由老師講解人體結構,最合適食乜,唔應該食乜,細細粒開心獲益良多:「原來連飲水及呼吸法都有技巧,要細細啖飲40度恆溫水,好似我咁嘅重量,頭4日要控水,只能飲1枝半樽裝水,因為飲太多水對腎臟唔好,仲要下午5點後不能飲水,至第朝9時半後;另外要配合呼吸法,吸氣後用鼻呼5至8秒,再閉氣3至5秒,然後換氣。」細細粒又提到完成療程後能保持正常飲食,體重亦唔會反彈,「以前我試過好多極端減肥法,包括中藥、食代餐、做劇烈運動都唔得。」最後細細粒都成功減咗18斤(19.8磅),最新體重182.9斤(約200.6磅),但笑言目標係減到得返130斤(140磅)。

減肥變索非為媾仔

問到剛38歲的細細粒,生日願望是否變索女媾仔?她大笑說:「唔會喇,我反而想買多幾層樓。」近年做帶貨賺到7位數嘅細細粒,自爆家人在家鄉上海已有物業,但她都有在大灣區置業,今年初更「升呢」在港島區做業主。問到係咪買近億豪宅?她就保持神秘:「唔係啦,唔講錢,總之負擔得起,哈…我心中富有!」她乘機澄清在紐西蘭冇物業,之前拍的紐西蘭睇屋片純為搞笑:「眼見個個話我係隱形富婆,咪拍嚟玩吓啫,我都冇喺當地買樓。」

上月29日係細細粒38歲牛一,她手持花束及蛋糕,精神奕奕影相闢謠。
上月29日係細細粒38歲牛一,她手持花束及蛋糕,精神奕奕影相闢謠。
細細粒年初喺港島區置咗業,仲養埋4隻可愛小貓。
細細粒年初喺港島區置咗業,仲養埋4隻可愛小貓。

《星島頭條》APP經已推出最新版本,請立即更新,瀏覽更精彩內容:http://www.stheadline.com/