蔡潔努力工作進駐千萬豪宅 景觀開揚裝修有品味啱晒女主角身份
發佈時間：16:30 2023-06-06
選美出身的蔡潔，最近在劇集《一舞傾城》中「Monica」而大受歡迎，一洗過往給人嬌滴滴的印象。入行10年的蔡潔坦言在演藝事業非常好幸運，在努力工作下，近年「搬咗一個好啲嘅地方」，她的香閨有露台及落地玻璃，景觀開揚，與女主角的身份很相符！
【相關閱讀】：一舞傾城丨53歲唐文龍與「沙律媽」結局悲慘？編劇自爆遭蔡潔電話狂轟
【點擊睇蔡潔間屋有幾靚】：
蔡潔在2012年參加《墨爾本華裔小姐競選》，囊括包括冠軍及最上鏡小姐等七大獎項，創下地區紀錄，到了2013年， 她代表墨爾本參加《國際中華小姐競選》，獲得「最受傳媒歡迎佳麗」獎，比賽後返回澳洲完成學位，當時竟然修讀導演系：「我自己都冇諗過，由細到大到鍾意睇電視同電影，又鍾意睇書同自己寫吓嘢，係我爸爸睇到呢樣嘢，咪叫我去試吓，跟住碩士都讀啲關於幕後嘅嘢，因為就嚟畢業都唔知自己想做啲乜嘢，咪讀吓書先。」
蔡潔回港後在幕前演出，她坦言在演藝事業非常好幸運：「當然呢行嘅工作唔會日日都會有，喺經濟上都曾試過緊拙，不過都未去到生活當困難。我自已離咗開爹哋媽咪嘅懷抱好多年，自從出嚟做嘢，開始嘗試獨立，靠自己，雖然係咁，都叫活咗落嚟，由一開始嚟香港一個朋友都冇，乜嘢都唔識，到而家第10年，多咗好多朋友，對呢個行業又熟悉咗，又可以同鍾意嘅班底合作，仲有啲咩好去奢望呢？我真係好幸運！」她還說：「雖然而家未有任何獎項，但係我覺得都可以慢慢嚟。」
努力工作為父母有安樂窩
因為疫情關係，蔡潔跟父母有多年未有見面：「我而家努力工作，搬咗一個好啲嘅地方，希望佢哋得閒就過嚟探我，或者我去探佢哋。佢哋成日都擔心我一個人，成日都『日哦夜哦』，叫我唔好食咁多外賣，要早啲瞓覺，乜都『哦』一餐。」感情方面，蔡潔說：「我30歲之前係一個好有計劃嘅人，但係而家明白有啲嘢係冇得計劃，我驚自己太有計劃，好多嘢都會失望，所以不如順其自己，結婚都係冇得paln，要嚟就會嚟，我反而覺得唔可以違背自己嘅諗法，好似話為咗工作拒絕感情，似乎唔係喺真情流露嘅狀態，所以做演員不如誠實啲面對自己嘅狀態！」
訪問中，談到在《一舞傾城》的造型，蔡潔笑言經過多次調整：「嗰個年代嘅靚就係要眼線向上翹同頭髮大波浪，成個造型好heavy，我都有啲睇唔慣。其中有參考係鍾楚紅，佢真係好襯大波浪髮型，但我本身個頭好大，髮量又多，大波浪就好似成個頭盔咁，我哋要改好多次先有個靚造型。」蔡潔形容今次拍攝過程非常開心和難忘，係一個好嘅回憶：「大家一齊開心，收工之後又一齊傾偈，好似返番讀書時代咁。」
蔡潔提到近年自己「搬咗一個好啲嘅地方」，希望父母來港時有一個安樂窩，原來她「升呢」女主角之後，入住郝德傑山千萬豪宅，蔡潔經常在社交平台分享與貓貓的合照，見到她家有露台及落地玻璃，景觀開揚，家中更擺放了一個白色鋼琴，她不時大晒琴藝！
【其他閱讀】：
「Jacky 仔」王樹熹移居日本過新生活 返港探親po近照驚變日系美男
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
