兩代歌手踏主場館舞台同興奮冀未來開個唱

更新時間：03:00 2025-03-02 HKT
發佈時間：03:00 2025-03-02 HKT

　　首次踏足啟德體育園主場館演出，容祖兒在表演後向《星島頭條》分享謂：「好榮幸、好興奮，可以喺舞台上面望住呢個Stadium。感覺好新鮮，場地好大，就咁行都真係幾索氣㗎。音效都好好，唱咗《越唱越強》，都有特登重新編曲同排舞。」被問到是否想在體育園主場館開演唱會，祖兒坦言：「一定會想，都一定好玩，同埋喺呢啲戶外嘅場館，睇就睇得多，所以期待自己可以喺呢度有一個屬於自己嘅演唱會。」
「覺得呢個場館好震撼好大」
　　Gin Lee李幸倪演出後表示：「表演嘅心情係非常之興奮同埋期待，直到升降台升出嚟見到全場坐滿咗咁多觀眾，原來都係會有啲緊張，但係好快就返番去好享受呢個舞台。因為今日只係唱一首歌，所以我都要好好把握每一分每一秒喺呢個台上面嘅感受。好開心今次可以同大家第一時間去感受呢個場館。我覺得呢個場館好震撼！亦都好大！見到有咁多觀眾喺度，個感覺係『嘩！』好震撼。非常希望自己都有機會喺呢度開騷，如果喺呢度開騷，我已經有好多諗法，呢個場咁大、咁好嘅一個地方，有好多發揮嘅空間，例如可以設計一啲特別效果嘅舞台，希望有機會可以喺呢度開騷啦。」
　　MC張天賦同樣首踏主場館舞台，他演唱後分享感受：「今次嘅表演係最緊張嘅一次，腎上腺素飆升最勁嘅一次。不過即使緊張都冇影響到我享受個舞台！今次嘅舞台非常大，非常闊落，而且亦有好多唔同嘅機關，綵排時其實都已經幻想緊如果自己開演唱會嘅時候場面會係點樣，他朝有日如果可以開個人演唱會，我都希望可以用多啲舞台設計！所以諗完就更加興奮。《記憶棉》呢首歌大會揀嘅，都算係我拿手嘅一首歌，亦都算係我嘅代表作，好榮幸可以以呢首歌作為我係大場嘅第一次表演歌曲，我會繼續努力，希望終有一日可以喺啟德呢個場開個唱啦！」

↓立即下載星島頭條App↓