姜濤首回應「我最喜愛」風波 撐花姐為MIRROR好
發佈時間：03:00 2025-07-14 HKT
MIRROR經理人花姐早前指「我最喜愛」獎項等於沒有實力，惹來「鏡粉」（MIRROR粉絲暱稱）不滿，姜濤即時要幫花姐澄清，直指花姐的意思不是那樣，並透露花姐特別找他解釋事件。對於盧覓雪質疑他墮海的講法，又指姜濤「情緒冇問題，智商應該有啲問題」，姜濤坦言沒留意太多，更指所有評論一定有主觀性，會用客觀心態去睇自己。
姜濤昨日到尖沙咀出席服裝活動，被問到早前因頭痛要食藥，他表示已好返，至於手上的傷勢，他透露有點疤。對於盧覓雪在姜濤發生墮海事件後，在節目中指姜濤「情緒冇問題，智商應該有啲問題」，姜濤坦言沒留意太多：「公司叫我盡量唔好上網睇，驚影響我心情，所以我都冇乜太過留意。所有評論一定有佢嘅主觀性，不過我哋都會用一個客觀心態去睇自己。」至於被盧覓雪質疑他墮海的講法，姜濤指正常，因為公眾人物有很多被猜測和質疑的地方，自己都覺得合理。問到會否覺得委屈？他說：「過咗嗰個年紀，唔會有咩委屈。（𠵱家心理質素好好？）時間浸出嚟！」對於出事後毛舜筠以短訊慰問，他表示好多謝對方，其實有很多前輩都關心自己：「因為呢件事，我睇到身邊有好多人真係好關心我，所以我覺得係好事嚟嘅。」
花姐早前指「我最喜愛」獎項等於沒有實力，由於姜濤與MIRROR過往曾多次獲「我最喜愛」獎項，故惹來「鏡粉」不滿，姜濤表示要幫花姐澄清，指每個人都知道花姐是為他們好：「佢講嗰番說話係中間剪咗出嚟，可能有啲前文後理，代表佢唔係真係咁樣嘅意思，因為佢嘅初心都係為我哋好。花姐都有特登搵我講佢真係唔係咁嘅意思，話佢從來都冇諗乜嘢特別意思。」對於花姐言論引起大家不滿，姜濤即笑說：「小心啲喇咁樣！其實我最擔心係佢，佢因為照顧我哋都遭受好多言論，其實係一件好小嘅事。」
送生日蛋糕賀AL
另外，早前Anson Lo與隊友食飯慶祝生日，但未見姜濤出席，他指當日要綵排，加上有自己事要忙才缺席，自己都很想去，私下也有跟對方講生日快樂及送生日蛋糕；至於Anson Lo在姜濤墮海後貼出在海邊的照片惹來討論，姜濤表示只是巧合，了解Anson Lo的人都知道他喜歡在海邊影相。
