李辰安 - 百歲人生時代｜辰來之筆
發佈時間：00:01 2023-03-28
傳媒大亨迎來第五次婚姻
聽講傳媒大亨梅鐸92歲迎來第五次婚姻，大家在中環酒館為他舉杯慶祝，呢位壽星公新郎哥，掂呀！
大師兄好冷靜，大家放低酒杯之後，佢贈大家一句︰「如果呢位老人家係樓下三叔公，攞老人金同綜援過活，大家有無咁喜氣洋洋。」其實，我真係唔想窒佢，你鋪話法，有呢單街坊新聞，你唔使憂香港各大媒體唔會報憂，就係大台都會望完看完，又再睇真啲，92歲阿公又又又再結婚，肯定熱搜新聞Number One啦。不過，我當然唔會窒人窒到出口，話晒都係師兄，你話係敬老又好，和諧也好，難得大家把酒言歡！
張翁好似好興奮，佢飲完一大杯啤酒，再來一杯，仲要同大家講故事︰「我鄉下有位親戚好身壯力健，九十幾歲再娶老婆，雙方年齡差成四分三個世紀，咁都未係傳奇，一百歲時幸得一名女兒，全村開心到不得了。」原來老尚風流是壽徵，老人家有福氣，亦代表家族有福氣，所以大排筵席，隔籬村都過嚟賀一賀。
呢位壽星公個女亦好爭氣，長大成人留學美國，依家在彼邦定居，張翁同佢係親戚，去美國都有搵佢飲茶。「一百歲都添丁，咁即係人生開始，如果識唱歌都可以參加老年好聲音噃。」大師兄又搵我嚟鬧︰「安仔，你都九唔搭八，你去搞個老年好聲音比賽呀？」我心諗，我有財有勢又有號召力，就不如搞個老年好結婚啦。
銀行偉好有興致，原來日本時興60歲過外老男人搵50歲的異性談戀愛，得閒相親，有緣就步入教堂，呢一個風氣催生了一條銀髮族之產業鏈，阿公阿婆都要珍惜青春，你話有幾多生意可做？「婚姻介紹所就好生意，美容健身亦會多咗好多不是年輕人的顧客。」係啦，你睇龍哥幾紅粉緋緋，仲有四哥、修哥耐不耐都有緋聞，老人家唔係孤獨一個人坐公園數落葉，可以扮靚仔同好朋友拍拖。
日本老齡化 80歲服務員好平常
講開傳媒大亨，佢有咁多身家，結多幾次婚，容乜易分晒？「世侄，佢係世界級富豪，自然有好多合約安排同保障，就當佢大方同有緣人分身家又如何？錢又帶唔走，最緊要開心。」不過，日本係老齡化社會，男女以「人生百歲」為生活目標，你估60歲退休之後，係咪仲要做到90歲先至搞得掂，事關唔係人人都係傳媒大亨。
「辰哥，你有留意新聞都知日本好多服務業人手短缺，80歲服務員好平常，90歲喺漢堡包店炒散都有。」講時講，醫學昌明大家又識得調理身體，平時注重健康，80歲返工都OK啦，修哥90歲都開演唱會，真係好青春。
「世侄，我有個世伯過百歲啦，新年同我哋打麻將，仲約定出年早啲嚟，食幾件年糕，飲杯普洱茶先，開心到成個細路仔咁。」我想起，原來人生可能未行到一半，因為呢一個係一百歲年代，但係，你有壓力我有壓力，如果60歲退休，未來成半個世紀咁長，邊度搵錢養活？如果65歲先至結婚，或者再再次結婚，呢頭家點頂？我係傳媒大亨就無問題，學似修哥識唱識跳咁就更好，不過，要我90歲返工，放工又要顧住拍拖，你估有無咁好精力？
「安仔，諗咁多，開支威士忌補身，血氣運行，包你精神。」張翁話︰「不如今晚去飲燉湯，男人要補下至得。」都有道理，學似龍哥話，最緊要生活協調，呢句係金石良言，唔好忽略呀。
《星島申訴王》於3月1日隆重登場，節目為民請命抱不平、追蹤城中熱話，亦會搜羅溫情小故事。你申訴，我跟進，搵91999933，《星島申訴王》隨時候命！
立即報料：https://bit.ly/3IMunqd
你的獨家報料一旦被採用及報導，將獲得乙份獎品。
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
