李辰安 - 兔年通關行大運｜辰來之筆
發佈時間：03:00 2023-01-17 HKT
中港正常通關，大家不是好感動，就是好興奮，而我就好淡定，是日飲茶食點心，心無漣漪。
茶樓老闆忙於招呼客人，聽部長講佢下禮拜上廣州，一方面探親，同時考察下內地市場環境。「係呀，李生，你咁早嚟，你班老友未到。」我循例叫壼普洱先，問下老闆有乜好介紹，原來年近歲晚，最好食臘味咁話喎。「年初五要出門，第一站係佛山，然後先至係廣州。」原來老闆係黃飛鴻同鄉，佛山人是也，佢有個細佬早兩年抱孫，但係疫情關係無上過去睇侄孫，所以趕住返去。
張翁同大師兄剛到，今日銀行偉去咗日本旅行，所以一行三人，大家有興趣食臘味煲仔飯？「蒸碟臘味，食白飯好啦，煲仔飯好熱氣。」張翁好照顧自己身體︰「大佬，千祈唔好中，中咗，雖則話好快『陽康』，最驚有條路，變咗『王重陽』。」我心諗，你老人家食唔少人參保身，又話練太極同武功，使乜驚。「安仔，你有無諗住上大灣區，好多平靚正樓盤，等你埋嚟睇、埋嚟揀。」講呢啲，點下食乜點心啦。
老闆行開咗，我同大家講佢就嚟上佛山去廣州，張翁好似幾有興趣。「你知唔知廣州上下九步行街，之前十鋪九執笠，死死下咁，但想唔到復常通關，市場馬上有生氣，如果你喺早三幾個月去租定幾個平鋪，或者有實力買咗佢，依家就肥過金銀膶，中間成嚿都係油呀。」老闆啱啱聽到，佢話無金銀膶，只有孖膶腸。「張翁，你講得對，超人話，好唔好睇得咁好，淡唔好睇得太淡，我個同鄉朋友就係夠膽早半年去掃咗幾個廣州舊區旺鋪在手。」
大師兄話，睇電視劇先至有呢種情節，咁淡個市你去掃貨？你老鄉係玄學家咩。「嗱，你就唔好唔信，鄉里同我細佬講，古人智慧有云︰大疫不過三年，就算好似新冠咁惡，佢就博最快玩三年，於是幾個月前在最低迷之時，傾咗幾個筍盤返嚟。」
我上網追查一下大疫，不過三年之根據，史上最惡嗰隻西班牙流感，係由1918年1月至1920年4月，由爆發到結束，造成當時世界人口約四分之一，即五億人感染，大約造成了全球五千萬人死亡。然而，西班牙流感也不外是兩年零時間。
張翁直豎拇指︰「叻，真係投資奇才。」老闆話，主要唔係炒賣，而係手上有鋪，準備大搞飲食，事關廣州好多名牌店在新冠肆虐期間結業，如果諗到大疫不過三年，今年有靚鋪在手，開三幾家大酒樓，日後一定好生意到做唔切，最緊要係有鋪在手，鋪租又平，租約又傾得長，未來幾年好好做。
老闆話︰「所以鄉里叫我細佬同我講，返去畀下意見，開酒樓要有新派特色，問我香港有乜招牌嘢。」發啦，老闆第二日可以做埋股東，聲音兩邊走，成班鄉里團結同心，其利斷金。
張翁話，可以研究下新派港式點心。「香港上世紀八十年代搞過一次港菜改良，有好多新發明，乜嘢楊枝甘露、XO醬，又有溏心鮑魚、西式粵菜，講講下都有幾十年，依家係時候再創新，結合廣州美食，加入中山、順德、潮州等等特色，度出一個大灣區新派點心，已經好掂，當然，最緊要有搵到真銀之新派貴價菜啦。」
老闆見到張翁講到眉飛色舞，問佢不如一齊去廣州行下。「好，我約埋呢幾位老友，過咗年再研究。」我心諗，真係成行？我要攞定幾日假。
