李辰安 - 兔年通关行大运｜辰来之笔
发布时间：03:00 2023-01-17 HKT
中港正常通关，大家不是好感动，就是好兴奋，而我就好淡定，是日饮茶食点心，心无涟漪。
茶楼老板忙于招呼客人，听部长讲佢下礼拜上广州，一方面探亲，同时考察下内地市场环境。「系呀，李生，你咁早嚟，你班老友未到。」我循例叫壸普洱先，问下老板有乜好介绍，原来年近岁晚，最好食腊味咁话㖞。「年初五要出门，第一站系佛山，然后先至系广州。」原来老板系黄飞鸿同乡，佛山人是也，佢有个细佬早两年抱孙，但系疫情关系无上过去睇侄孙，所以赶住返去。
张翁同大师兄刚到，今日银行伟去咗日本旅行，所以一行三人，大家有兴趣食腊味煲仔饭？「蒸碟腊味，食白饭好啦，煲仔饭好热气。」张翁好照顾自己身体︰「大佬，千祈唔好中，中咗，虽则话好快『阳康』，最惊有条路，变咗『王重阳』。」我心谂，你老人家食唔少人参保身，又话练太极同武功，使乜惊。「安仔，你有无谂住上大湾区，好多平靓正楼盘，等你埋嚟睇、埋嚟拣。」讲呢啲，点下食乜点心啦。
老板行开咗，我同大家讲佢就嚟上佛山去广州，张翁好似几有兴趣。「你知唔知广州上下九步行街，之前十铺九执笠，死死下咁，但想唔到复常通关，市场马上有生气，如果你喺早三几个月去租定几个平铺，或者有实力买咗佢，依家就肥过金银膶，中间成嚿都系油呀。」老板啱啱听到，佢话无金银膶，只有孖膶肠。「张翁，你讲得对，超人话，好唔好睇得咁好，淡唔好睇得太淡，我个同乡朋友就系够胆早半年去扫咗几个广州旧区旺铺在手。」
大师兄话，睇电视剧先至有呢种情节，咁淡个市你去扫货？你老乡系玄学家咩。「嗱，你就唔好唔信，乡里同我细佬讲，古人智慧有云︰大疫不过三年，就算好似新冠咁恶，佢就博最快玩三年，于是几个月前在最低迷之时，倾咗几个笋盘返嚟。」
我上网追查一下大疫，不过三年之根据，史上最恶𠮶只西班牙流感，系由1918年1月至1920年4月，由爆发到结束，造成当时世界人口约四分之一，即五亿人感染，大约造成了全球五千万人死亡。然而，西班牙流感也不外是两年零时间。
张翁直竖拇指︰「叻，真系投资奇才。」老板话，主要唔系炒卖，而系手上有铺，准备大搞饮食，事关广州好多名牌店在新冠肆虐期间结业，如果谂到大疫不过三年，今年有靓铺在手，开三几家大酒楼，日后一定好生意到做唔切，最紧要系有铺在手，铺租又平，租约又倾得长，未来几年好好做。
老板话︰「所以乡里叫我细佬同我讲，返去畀下意见，开酒楼要有新派特色，问我香港有乜招牌嘢。」发啦，老板第二日可以做埋股东，声音两边走，成班乡里团结同心，其利断金。
张翁话，可以研究下新派港式点心。「香港上世纪八十年代搞过一次港菜改良，有好多新发明，乜嘢杨枝甘露、XO酱，又有溏心鲍鱼、西式粤菜，讲讲下都有几十年，依家系时候再创新，结合广州美食，加入中山、顺德、潮州等等特色，度出一个大湾区新派点心，已经好掂，当然，最紧要有揾到真银之新派贵价菜啦。」
老板见到张翁讲到眉飞色舞，问佢不如一齐去广州行下。「好，我约埋呢几位老友，过咗年再研究。」我心谂，真系成行？我要攞定几日假。
