葉澍堃 - 澳門「氹仔漁村」 食白灼基圍蝦及香煎龍脷 | 葉Sir食經
今年暑假在澳門Galaxy酒店一樓「氹仔漁村」跟孫仔孫女食了頓開心晚飯，下午6時到達，餐廳已經坐得滿滿，原來大家趕着8點前食完去看陳奕迅演唱會，我們在房內用餐，「漁村」黎村長Eric早已為我們發辦寫菜，餐前先來杯陳皮普洱，陳皮香氣迷人，普洱止渴生津。前菜3款，分別是黑松露珍菌素鵝、漁村鮮吊筒及酥脆七味豆腐，素鵝做得精緻，賣相似三文治，好食非常 ；漁村吊筒是新鮮魷魚，大大隻炸得金黃，外脆內軟，一點不韌，佐酒一流；七味豆腐炸得酥脆香口，孫仔孫女食過不停。
湯羹是雲南松茸浸桂花雞，熱騰騰的雞湯鮮甜無比，村長Eric席前為我們用新鮮雲南松茸來煮湯，爽甜的松茸香氣迷人，難怪有菇菌之王美譽。是夜另一款菇菌是老人頭菌炒富貴蝦，香甜的老人頭菌跟瀨尿蝦用XO醬炒得香辣惹味，瀨尿蝦一朝富貴，味道好像特別嫩滑鮮甜！跟着食太座最愛的白灼基圍蝦，基圍蝦鮮甜無比，在香港已經很難食到，有緣在澳門再遇，當然要多食幾隻！魚是香煎澳門大龍脷，這是真正澳門海魚，煎得皮脆肉香，滋味無窮，絕非法國多嚿魚可比！
繼續食鮑汁花膠豬手煲，香滑的花膠筒每人兩塊，豬手仔嫩滑非常，是充滿膠質的一道菜，食完有排不用做facial！馬拉盞蝦干肉碎啫法邊豆也是佳品，法邊豆清甜鮮嫩，一點渣也沒有，吸取了肉碎和蝦乾的鮮味，是星級美食。素菜是竹笙如意上素，清新健康，清清腸胃甚佳。單尾是脆椒海參炒熊貓米，山東熊貓米跟熊貓一樣有黑白兩色，形狀長長像印度米，用櫻花蝦、泡椒和海參粒炒得口感香脆，鮮香惹味，雖然已經很飽，也堅持把一大碗飯食完。
甜品是楊枝甘露和一口芝士奶凍，孫仔孫女以前食過，喜愛非常，村長特別為小朋友再做這兩款甜品，認真有心。楊枝甘露是夏日最佳凍甜品，西米香滑，芒果香氣迷人，一口芝士奶凍香甜鬆化，有芝士香味，大人小朋友食得同樣開心，最後飲杯茉莉茶，香得像太座以前用的Diorissimo香水，最合我等茂利口味。黎村長兩年不見，功力大進，是時候升級做市長了！
葉澍堃
