頭條戲場 - 《錢財心愛物》頻頻放閃 | 頭條戲場
頭條戲場
3小時前
字體大小
相比導演宋席琳前作《從前的我們》那種扭扭擰擰的愛情觀，《錢財心愛物》單刀直入，爽快得多。Dakota Johnson周旋於Chris Evans、Pedro Pascal之間，索女型佬頻頻「放閃」，加埋靚靚紐約景，確係心曠神怡。愛情與麵包，點樣揀？冇得Why not both㗎。（上映中）撰文︰華朗
電影的英文名《Materialists》，開宗明義就是物質主義者，刻劃Dakota這位理性、拜金的婚介顧問形象，她為客戶撮合姻緣，當中會看到男男女女「擇偶條件」這方面的情節，又好笑又荒謬，仲有陌生男女約會時遇到的驚心動魄。
欲望「增高」
Dakota認為感情不過是利益交換，但當她同時遇上「高富帥」Pedro與「高窮帥」Chris，在有頭有面新歡，與不切實際掛住追夢的舊愛之間掙扎，似畀蟻咬，深受矛盾折磨。Pedro的存在就是「外貌協會」的會長，外貌包括樣子、身高、身家，包括追求達致「完美」的那份欲望，那一刻我腦袋真的閃過梅艷芳《慾望野獸街》「欲望Jungle……」歌詞，皆因他的欲望是「增高」，碎骨增高！我好怕一類鏡頭，一對戀人或者夫婦同床，瞓醒牙都未刷就kiss！放心，Dakota、Pedro冇咁樣做，甚至女方有心事，佢都sense唔到，物質100分但係不解溫柔；反觀Chris好識睇前度眉頭眼額，像有雷達般。導演小心翼翼營造角色之間的距離感，就是告訴觀眾感覺無法計算出來。「愛」究竟是無條件的深情，還是理性之下的現實選擇？結局Dakota揀邊一個，不言而喻啦！
不過，Dakota由算到盡變到乜嘢都唔計，女人心真係海底針，快過「快銀」，只能解釋愛情果然令人盲目。
頭條戲場
宋席琳前作《從前的我們》扭扭擰擰，新作明快得多。
Zoe Winters同陌生人約會，搞到自己一身蟻！
Dakota理性又拜金，那Pedro是她真愛啦！
Chris在戲中好鬼Chok！
拍到Dakota超靚！
Dakota新歡是「高富帥」Pedro，但不解溫柔。
