【旅遊】馬來西亞｜公幹先食到？正宗地道美食

眼睛去旅行

旅遊網誌作者|每一個旅程, 都總藏著不同的"秘密"

2022-04-21 10:30 HKT

生活專欄

內容

其實小編跟舊式旅行團去過泰國一次之後，無幾耐之後都跟團去咗一次馬來西亞，呢次個團由長輩負責挑選 (全部都係長輩，小編都只係〝掹衫尾〞)。

嗰次真係呢……記憶比泰國仲要少，只記得3樣嘢：團飯食蠶蛹 (小編當然無食啦)、成條街得1間酒吧嘅〝夜市街〞，同埋每晚7點已經返到酒店房。大家唔好以為只得小編悶喎，同行長老第一晚返到酒店房已經話想返香港。

因為工作嘅關係，小編以前經常要出差公幹。老實講公幹同旅遊係兩碼子嘅事，因為公幹係好難有放鬆嘅心情，事實真係去做嘢吖嘛，係咪？

但反而公幹比起旅遊可以令你更容易體驗到當地嘅文化，小編好多時因為咁先有機會食到真正嘅地道嘢。

有次去馬來西亞公幹，雖然多數時間都係開會、開會同開會，但總有休息嘅一刻。中午當地嘅同事會帶我哋去食啲非常地道嘅嘢，呢啲通常都係佢哋每日都會去嘅大牌檔、茶室之類。印象比較深刻有3樣嘢，雲吞麵、肉骨茶同咸檸檬 (手信)。當地嘅雲吞麵同香港好唔同，因為我只係食到雲吞皮，入面無乜餡；而肉骨茶亦同旅行團帶你去食嗰啲唔同，味道甘好多。印象最深刻嘅反而係同事帶小編去一間非常舊式嘅手信店，嗰度有啲一盒盒白色盒嘅咸檸檬，小編買咗幾盒返香港送比一個朋友，因為佢經常都話牙肉痛。原來真係好有效，朋友用一粒嚟沖一大樽水當水飲，飲咗2日就好返。唔知大家有無見過呢？如果有見過或知道小編講緊嗰盒係咩，麻煩聯絡一下小編，因為真係好想再買到。 #馬來西亞 #吉隆坡 #公幹 #出差 #肉骨茶 #雲吞麵 #咸檸檬 #地道食物#Malaysia #KualaLumpur #businesstrip #bakkutteh #wontonnoodles #saltedlemon #authenticfood