人生第一次去旅行 | 泰國

眼睛去旅行

旅遊網誌作者|每一個旅程, 都總藏著不同的"秘密"

2022-03-29 07:30 HKT

生活專欄

內容

因為疫情關係，已經有兩年無出走過喇......唔知大家又等咗幾耐呢？無得出走大家都好辛苦，完全可以話係覺得生無可戀。越想出走就越諗起以前快樂嘅時光，一堆堆嘅畫面同回憶突然返哂嚟，唔同嘅地方、唔同嘅旅伴、唔同嘅經歷、唔同嘅感受，真係太多太多......

不過做人又點可以咁灰呢？！唔可以將自己俾負面情緒籠罩住架嘛，係咪？！

小編做人比較阿Q，唔俾出走咪唯有回憶一下，至少可以令自己記起一啲開心嘅時光 (當然係選擇性啦，如果大家係都要去記一啲唔開心嘅經歷咁小編都無辦法)。

記憶中泰國應該係小編第一個旅遊嘅地方 (相信好多人同我一樣)，雖然無辦法諗起太多，但至少有2個地方係印象比較深刻，第一個就係湄南河。記得嗰陣時嘅觀光船邊有依家咁靚咁安全吖，感覺好唔穩陣，所以小心翼翼上船後完全唔敢郁，真係好驚佢會反。乘船途中睇下周圍嘅景色，感覺呢個地方好樸素好寧靜，啲屋就喺條河嘅河邊，有幾級樓梯，當地人就喺尼條"泥黃色"嘅河水度洗衫同玩水。

當架船去到某一個位就停低咗，之後開始有啲售賣商品嘅船駁埋黎，有水果、食品、飲品、飾物、花......好多唔同種類。船上大多數人都係買麵包用嚟餵河入面嘅魚，一放舊麵包落去，原本平靜嘅泥黃色水面即刻出現好多非常大條嘅黑色魚 (啲魚大到小編有啲驚)，啲魚加埋泥黃色水喺度不停郁動，若隱若現。後來發現影低呢一刻嘅相，出嚟嘅相竟然變哂好似雲石相一樣，不過都唔緊要，因為記憶會永遠留喺腦海。呢個就係小編對湄南河嘅記憶，唔知大家又有無諗起啲咩呢？

#泰國 #湄南河 #旅遊 #回憶 #泰國遊 #經歷分享