胡慧沖 - 曼谷 永遠估你唔到 | 筆泰沖動
胡慧沖
1小時前
字體大小
早幾日我去咗一個好似動漫展嘅大型活動，本身諗住四圍行吓、睇吓精品、感受吓氣氛。點知一行到會場，遠遠已經見到人山人海，幾層人圍到水洩不通，仲有唔少人一早霸定靚位，個場面誇張到我第一個反應就係：「邊位國際巨星嚟咗呀？」結果一路迫到前面，真相揭曉……原來唔係明星，亦唔係歌手，而係一班卡通大公仔出場！
不過佢哋又唔係大家熟悉嘅Hello Kitty、Pop Mart，又或者迪士尼角色，而係泰國某電視台推出嘅卡通劇人物。老實講，如果第一次見，你未必會覺得佢哋特別可愛，又未去到搞笑得令人捧腹，甚至可能仲會心諗：「點解會咁受歡迎？」
但神奇嘅地方正正就係呢度。
當呢班角色一出場，全場即刻尖叫聲四起，粉絲瘋狂影相、揮手、歡呼，手機全部舉高。最令我意外係，現場粉絲幾乎清一色都係女士，由青春少女、上班族，到中年女士甚至成熟淑女都有，年齡層橫跨幾十歲，完全打破我對卡通角色粉絲群嘅想像。
有時泰國嘅流行文化就係咁有趣。你以為一定係靚仔明星、韓團偶像先可以造成轟動？原來一班由本土電視台打造出嚟嘅卡通角色，同樣可以吸引成千上萬粉絲專程到場支持，氣氛一啲都唔輸畀明星見面會。
呢一刻，我又再次感受到Amazing Thailand唔係一句旅遊口號，而係一種隨時會令你大跌眼鏡嘅日常。你永遠估唔到下一個轉角，究竟會遇到咩新鮮事。呢個，就係泰國最有魅力嘅地方。
胡慧沖
最Hit
