胡慧冲 - 曼谷 永远估你唔到 | 笔泰冲动
胡慧冲
2小時前
字体大小
早几日我去咗一个好似动漫展嘅大型活动，本身谂住四围行吓、睇吓精品、感受吓气氛。点知一行到会场，远远已经见到人山人海，几层人围到水泄不通，仲有唔少人一早霸定靓位，个场面夸张到我第一个反应就系：「边位国际巨星嚟咗呀？」结果一路迫到前面，真相揭晓……原来唔系明星，亦唔系歌手，而系一班卡通大公仔出场！
不过佢哋又唔系大家熟悉嘅Hello Kitty、Pop Mart，又或者迪士尼角色，而系泰国某电视台推出嘅卡通剧人物。老实讲，如果第一次见，你未必会觉得佢哋特别可爱，又未去到搞笑得令人捧腹，甚至可能仲会心谂：「点解会咁受欢迎？」
但神奇嘅地方正正就系呢度。
当呢班角色一出场，全场即刻尖叫声四起，粉丝疯狂影相、挥手、欢呼，手机全部举高。最令我意外系，现场粉丝几乎清一色都系女士，由青春少女、上班族，到中年女士甚至成熟淑女都有，年龄层横跨几十岁，完全打破我对卡通角色粉丝群嘅想像。
有时泰国嘅流行文化就系咁有趣。你以为一定系靓仔明星、韩团偶像先可以造成轰动？原来一班由本土电视台打造出嚟嘅卡通角色，同样可以吸引成千上万粉丝专程到场支持，气氛一啲都唔输畀明星见面会。
呢一刻，我又再次感受到Amazing Thailand唔系一句旅游口号，而系一种随时会令你大跌眼镜嘅日常。你永远估唔到下一个转角，究竟会遇到咩新鲜事。呢个，就系泰国最有魅力嘅地方。
胡慧冲
最Hit
