KellyChu - 六合彩第5代攪珠機亮相 「馬蹄鐵」創新造型掀熱議 | Executive日記
KellyChu
1小時前
字體大小
還記得小時候互聯網尚未如今天普及，每次開六合彩，Kelly同屋企人都會睇準時間打開電視，紅藍綠三色號碼球喺攪珠機中轉動時嘅緊張，可謂大家最熟悉不過嘅感覺。原來六合彩攪珠機已經嚟到第5代，全新攪珠機以「財光馬蹄鐵」造型告別經典圓環，星期二正式亮相後已掀起網民熱烈討論。
六合彩全新第5代攪珠機喺星期二晚隆重登場，於第26/047期六合彩接力執行呢個關乎全港市民橫財夢嘅「神聖任務」。新機處女秀亦瞬間喺各大社交平台掀起討論，有網民認為新機同服務咗16年嘅第4代攪珠機外觀冇咩分別，亦有網民讚新機明顯更具現代感，將光環一分為二，呈馬蹄鐵形狀，燈光效果比以往更為明亮。更有網民指出，馬蹄鐵喺歐洲傳統通常被視為一種幸運符，象徵財富與平安，亦係香港賽馬會嘅標誌。唔知各位讀者又鍾唔鍾意呢款全新六合彩攪珠機呢？
KellyChu
更多文章
