KellyChu - 迪士尼美食巡禮以佳餚呈現故事 打造沉浸式「EATertainment」體驗 | Executive日記
KellyChu
4小時前
字體大小
香港迪士尼樂園昨日舉辦20周年奇妙美食巡禮派對，介紹多項即將推出嘅全新季節主題美食，包括大閘蟹、枝竹羊腩煲等秋冬菜式，以及萬聖節和聖誕節主題限定餐飲推介，並分享將美食變成結合娛樂的「EATertainment」體驗，例如食客可自製紙杯蛋糕上嘅奶油造型，打造沉浸式餐飲體驗，互動好玩！
香港迪士尼餐飲總監黃慶龍話，樂園喺2025財政年度嘅人均餐飲消費對比上個財政年度略有增長，賓客餐飲方面體驗評分持續強勁，其中「魔雪奇緣世界」自2023年開幕以來，累計已售出60萬枝「小白軟雪糕」。佢表示，旅客會選擇鍾意嘅迪士尼角色去規劃整個遊園體驗，餐飲團隊去年亦推出逾40款「Duffy與好友」產品，銷量接近50萬件，好受歡迎。
佢續指，餐飲部一直緊貼唔同嘅迪士尼IP、電影及節日主題，以美食呈現故事，例如20周年配合派對主題推出多人份量嘅派對套餐，短短一個月已售出超過4萬份，而今年「阿Jack怪誕大餐」甜品體驗則以阿Jack和莎莉嘅love story為靈感創作，甜蜜浪漫！配合《Zootopia2》即將上映，迪士尼餐飲部亦設計咗一系列主題小食，小妹期待陸續登場。
此外，香港迪士尼樂園於20周年生日正日當天（本月12日），開設以《魔海奇緣》為靈感嘅全新主題餐廳「領航者薈館」，提供獲香港回教信託基金總會認證清真餐飲，方便穆斯林旅客有合適嘅餐飲選擇。迪士尼今年將參與由旅發局主辦嘅美酒佳餚巡禮，支持推動盛事旅遊。
KellyChu
小妹試整莎莉造型紙杯蛋糕，縫紉要畫得靚都好考工夫。
將於12月底推出的聖誕節限定餐飲造型精美。
「晶荷軒」將供應大閘蟹時令精選套餐，「雲龍軒」亦提供「蟹」逅季節限定料理。
