鄧達智 - 今時今日鹿鼎薈 | 智智樂GO

智智樂GO

鄧達智

17小時前

生活專欄

內容

　　劉德華的傳世「好客之道」廣告……今時今日咁嘅服務態度；屬負面指責。

　　用在「鹿鼎薈」，則屬正面……今時今日，食肆員工事事關心，自動推銷，笑容可掬，言語爽利……唔「黑人憎」；真係極大恩典。

　　深圳食肆價錢從疫情以來陰啲陰啲上升不少，卻仍將香港拋離幾條街，並非全因性價比高；員工平均歲數維持二十出頭，面容靚唔靚屬主觀，重要乾淨企理，笑容不單止雙唇，更由雙眼展示。

　　吾本非火鍋Fan，純因小欣姐推介，欣然赴會靠近太子站E出口，彌敦道777號2樓「鹿鼎薈」。老闆可能是金庸先生粉絲，寶號取名鹿鼎，以及他們開店銷售的主角；日本培植的鹿角靈芝才是重心，以之入饌製湯作火鍋湯底，聽聞撇除熱氣，可減低痛風患者發作的機率。

　　老闆Raymond具成功商人氣場，不用口術推薦，讓食物的外觀把關，吃入口的食樂將顧客融化。

　　食店新，首重將名字傳開去；食材靚，味道好，顧客吃過不覺被搵笨等元素非常重要，每人港幣幾百元簡直是茶餐廳價，然而享受卻是素質上乘，色、香、味俱全；何須北上？怎可以不回頭？

　　前菜小點：20年鱘龍魚子醬/蟹肉/靈芝油炸雲吞皮脆脆。整條石蚌魚生Sashimi卷起，同樣20年鱘龍魚子醬，口感新穎，魚子醬鮮，魚肉香，一卷一卷吃個停不了。

　　主角養生火鍋：湯底用新鮮椰子熬製，絕無味精，清香雋永，加入鹿角靈芝片，納米鹿角靈芝粉，入口分外清甜；配襯鮮美文昌雞，手切本地牛頸脊，西班牙黑毛豬……只此一間鹿角靈芝油炸響鈴，午餐肉，凍豆腐。

　　已經九乘九飽，單尾還有蒜蓉牛油帶子炒雜菌，臘鴨腸焗飯。甜品鮮藍莓奶凍。大滿足豐盛甜美一頓飯，更讓我們見識原本陌生的鹿角靈芝在入饌方方面面的可能性。

鄧達智