KellyChu - 市民豪花7000蚊送禮 羅淑佩掀淘貨潮 全運會3特許商品店開售「好搶手」 | Executive日記

粵港澳三地共同承辦嘅第15屆全運會以及殘特奧會,將於今年11月起展開,首批香港賽區及廣東賽區特許商品備受注視,由昨日起登陸啟德體育園、西九龍高鐵站及灣仔入境事務大樓3間官方零售店。有市民笑言全運會好有意義,豪擲7000蚊掃貨送禮,亦有人說見到文體旅局局長羅淑佩光顧快閃店,特意到店掃貨,認為商品具紀念價值。
Kelly昨日先去到啟德探店,以全運會吉祥物「喜洋洋」、「樂融融」為主題嘅多款精品最可愛又吸睛。店員透露,昨早開門冇耐第一張單就賣出一件「喜洋洋」立體飾扣,小妹亦觀察到保溫杯、搪瓷杯等實用性紀念品吸引不少人駐足觀看。
有顧客話,係見到羅局長日前親身光顧快閃店,故特意到店淘貨,最後買咗一款旋轉手辦,直言:「全運會嘛,(有)紀念性。」市民黎女士選購咗一枚「會徽基礎款徽章」,可以戴上衣服上做裝飾。特許店業務負責人迂方明向Kelly指出,印有「掂過碌蔗」嘅祝福款搪瓷杯係啟德店最受歡迎嘅產品,估計杯子結合咗生活性使用和本地俚語,係其吸引之處,又說市民購買紀念品係參與全運會最佳方式。
啟德園店11月商品250款
佢又特別介紹咗一款售價468元嘅「福滿大灣徽章套裝」,話呢個套裝含有送福、納福、迎福之意,又有紫荊花、舞龍舞獅、港珠澳大橋等大灣區特色,寓意大灣區人民可以共同納福享福。他介紹,現時啟德店共有57款紀念品出售,待下月1號、即全運會倒數100日時,會再引進100款商品,預計到11月9日全運會開幕之時,店內紀念品可達到250款。
灣仔店昨天中午人頭湧湧,其中有市民購入搪瓷杯、公仔等紀念品,豪爽消費超過7000元,佢話部分係幫人買,自己主要都係買來送人,「因為好多客戶鍾意有香港特色又實用嘅產品,盲盒公仔就畀佢哋嘅小朋友」,並直言「全運會好難得喺香港搞,咪買多啲送人,紀念品好好,又可以促進下香港經濟。」
Kelly都留意到現場唔少市民對其中一款商品——「三國醒獅萌團」盲盒公仔好有興趣,部分購買人士更即場拆開,享受呢種「神秘快樂」。在港工作嘅內地人萬先生就偏好有香港特色風景嘅文創產品,佢大讚香港今次喺全運會方面嘅宣傳認真用心,「很多地方都有白海豚吉祥物,都見到有人打卡,也有關於全運會的歷史介紹。」
西九龍高鐵站店吸引較多內地遊客,有家長幫小朋友與「喜洋洋」、「樂融融」打卡合影,場面歡樂。其中來自天津嘅胡小姐表示,紀念品外觀設計吸引,「這次售賣的周邊都比較可愛,尤其是小孩子會非常喜歡。」來自武漢嘅張小姐就認為舉辦全運會可以成為大家了解體育嘅契機,希望國內可以再加強宣傳力度,讓更多民眾認識呢場大灣區盛事。
此外,羅淑佩入手搪瓷杯後,昨日喺FB分享「加加」、「得得」熊貓公仔小劇場,好有童真——加加說:「咦!個大杯杯好似就係電視見過Auntie Rosanna攞住,話好啱食餐蛋麵用嗰個全運會杯啊!」得得回應:「咁而家個杯有冇裝嘢食啊?其實裝滿奶奶咪啱晒我哋囉!」
全運會焦點商品
名稱價格(元)
粵港澳賽區城市文化徽章擺件(限量發售)800
「同心奮進」立體工藝擺件(限量發售)112
復古搪瓷杯78
「三國醒獅萌團」盲盒公仔95
「喜洋洋」「樂融融」毛絨玩具套裝 428
名稱價格(元)
福滿大灣徽章套裝468
「喜洋洋」或「樂融融」旋轉手辦88
非遺系列冰箱貼80
乒乓球拍磁吸鑰匙扣68
DIY洞洞杯118
發售點‧啟德體育園啟德零售館3地下中庭
營業時間‧周一至周五 10:00AM—9:30PM;
周六及日 10:00AM—10:00PM
發售點‧灣仔入境 事務大樓一樓
營業時間‧周一至周五 8:30AM—6:00PM;
周六 9:00AM—1:00PM
發售點‧西九龍高鐵站GFM層G6舖
營業時間‧10:00AM—6:30PM
KellyChu



