胡慧沖 - 又再圓夢（二） | 筆泰沖動

筆泰沖動

胡慧沖

2025-06-13 02:00 HKT

生活專欄

內容

　　上回講到又到一年一度國際旅遊展，今個星期又會喺香港同大家見面，多謝主辦單位邀請，亦多謝泰國旅遊局邀請，今年也會在場跟大家分享，而且會帶同表姐阿Yen在台上載歌載舞。

　　前年多謝經理人的安排以及投資者支持，推出過一些自己品牌的精品，而且在會展租了一個小小的Booth，但當時基於種種原因，結果辜負了投資者的心血，真的無言以對……只是我仍未死心……

　　今年可能是上天的安排，讓我一步一步創作出自己喜歡的一個人物「肥黑師兄」，之後不斷沉醉在有關創作之中，甚至打動了我的泰國朋友，願意一齊癲、一齊玩。

　　但相對於當年投資數十萬，今次我們只是小本經營，小型投資，當中認識到做生意的一些道理和運作，而且開始發現，當時投資者應該是被無良商家所騙，因為那些貨品根本冇可能值幾十萬……所以網上做生意真係要好小心。

　　老老實實，今次自己的產品全部都係瑣碎精品，絕對唔係甚麼名貴嘢，但製作過程係開心嘅。做生意最唔好就係因財失義，朋友之間因為錢而交惡，幸好和這位泰國朋友有情有義，至今仍無怨無悔，盡量替我圓夢……

　　經常講這些小生意唔會發達，勝在過程開心，尤其是見到一眾粉絲，甚至乎唔係粉絲都因為作品的設計得意過癮而購買，那份滿足感是難以形容的！唔期望你着件衫有我個Logo或者我個名，但有肥黑師兄公仔我已經好開心了！

　　今次準備咗好多唔同種類嘅貨品，由蚊怕水到泳褲都有，希望到時大家到來會展捧場支持，風雨不改。呢個星期六、日香港會展M125攤位見！

胡慧沖