KellyChu - 旅發局向法國推介街頭美食 楊潤雄烘雞蛋仔 招呼康城嘉賓 | Executive日記
KellyChu
2024-05-21 02:00 HKT
字體大小
港產動作片《九龍城寨之圍城》同旅發局嘅電影紀錄片《香港經典 光影重塑》，雙雙喺法國康城影展揚威，而本港街頭美食「雞蛋仔」亦喺呢次影壇盛事中亮相。文體旅局局長楊潤雄親自落場炮製雞蛋仔，請一眾外國賓客品嘗，以「雞蛋仔」說好香港故事，大家非常欣賞，話雞蛋仔外脆內軟，好好味！
香港旅發局積極宣傳香港嘅電影文化，不忘將香港特色街頭美食帶到法國。米芝蓮小食店「媽咪雞蛋仔」隨團出發往康城。由於途中大機轉小機，佢哋好擔心啲廚具同特別食材寄艙會「遲到」，結果真係有一件行李轉唔切機，好彩不是重要食材，冇太大影響。
「媽咪雞蛋仔」老闆娘Irene Wong同幾名廚師一齊獻藝，提供原味及朱古力味畀大家選擇。楊潤雄局長即場幫手烘雞蛋仔，見佢似模似樣，旅發局主席彭耀佳就喺旁邊打氣，兩人真係好有心，向國際推介香港街頭美食，可謂用雞蛋仔說好香港故事。Kelly試過局長手勢，雞蛋仔外脆內軟，暖暖地，非常好味，其他賓客亦讚不絕口。
KellyChu
「媽咪雞蛋仔」老闆娘Irene Wong獻藝，提供原味及朱古力味畀大家選擇。
更多文章
