鄧達智 - 盡情吵鬧鄉下歡迎你｜智智樂GO

鄧達智

2023-08-11 00:00 HKT

內容

事情發生地點喺富良野，充滿日本本國、韓國、台灣、香港及內地遊客之薰衣草種植場，另加賞花爾後，還可以大嚼著名甜到飛起北海道蜜瓜加雪糕，無人不愛無人不吃。再不喜歡排隊等吃，還是隨俗排隊15分鐘，購得蜜瓜加軟雪糕（見圖），坐下與同伴拍完Selfie，正準備開口大嚼⋯⋯對面珠圓玉潤師奶用廣東話大大聲劃過整個店子空間喊叫：「阿爸，你唔好拎畀我啊，我唔食㗎⋯⋯」咁有親切感，以為自己返咗香港，事實日本都係香港人嘅鄉下，公眾場所喧鬧嘅做法，係合情合理嘅，面對佢哋唔應該落後到大聲小怪嘅！

出外旅遊，尤其前往特別受歡迎嘅地區或國度，必須練就一套天真爛漫，想嗰樣做嗰樣，盡情喧嘩吵鬧嘅童真未泯等等與時並進旅遊態度；過去被視為冇規矩、冇家教、冇文化，今時今日呢種舊時被認為粗鄙既行為，先至係普世認同嘅出外旅遊態度。放眼望去，堅守過去認為不可思議嘅容忍待客之道，無論如何，依然微笑待客，近孚卑躬屈膝，除了日本，還是日本，難怪不少香港人稱呼日本做「鄉下」。

二戰之後，能有餘糧四出旅遊，世上旅遊業接待就只有第一強國美國嘅子民，粗聲粗氣係佢哋嘅童真本性，反正大聲得嚟又大方，貼士小費最多，誰都不介意，之後才輪到歐洲人。60年代東京奧運以後，日本遊客後來居上，大家都歡迎，既大方花費，正常情況態度安靜，絕對不會出現無國教、無家教、無文化等等行為，除了一項：飲醉酒嘅日本男人。情緒反常出晒名，尤其鹹濕！

近年異軍突起，先韓國人。隨後內地人、再下來印度人，跟美國人相近，全部出門遊玩，處處係鄉下，係佢哋自己屋企，總之嗓門喊到有咁大就咁大，這當中點會缺少喧嘩程度，位高前茅已變種嘅香港人？

鄧達智