KellyChu - 照亮佐敦逾半世紀 團體收藏保育 太平館又一霓虹招牌熄燈｜Executive日記
KellyChu
2023-08-08 00:00
字體大小
曾獲香港四大才子光顧、首創港式豉油西餐嘅百年老店「太平館餐廳」，繼尖沙咀老店嘅霓虹燈招牌2月「熄燈」拆卸，陪伴港人近60年嘅佐敦分店霓虹招牌，前晚亦完成任務，熄燈落幕。不過唔好失望，因為中環大館日後會將霓虹招牌重新展出，好快同大家再見！
太平館餐廳佐敦分店嘅霓虹招牌，早喺1964年茂林街開業嗰陣已經掛上，陪伴顧客達59年。招牌除咗要求霓虹師傅扭出薯條狀嘅燈管外形，仲保留裝飾風藝術風格，而招牌字體則出自嶺南派已故學者陳荊鴻嘅手筆，當中太平館餐廳嘅「餐」字寫成「飡」，喺香港招牌史上極為罕見。不過因應屋宇署「小型工程監管制度」，最終不獲署方批准保留。太平館餐廳第五代傳人徐錫安前晚就同霓虹保育機構「霓虹交滙」負責人到場，一齊見證呢面招牌熄燈落幕。
招牌預料之後會保存喺元朗倉庫，跟住會喺中環大館展出，重新同大家見面。佐敦分店稍後亦會仿效尖沙咀分店，重新訂造一個符合政府要求嘅迷你霓虹招牌，重新懸掛喺店外，延續東方之珠嘅霓虹故事。
小妹查下資料，發現早於1860年，太平館餐廳就由徐氏家族喺廣州太平沙設立，50年代到香港開設分店，主打菜式包括瑞士汁炒牛河、瑞士汁雞翼同甜品梳乎厘等。香港四大才子金庸、倪匡、黃霑同蔡瀾以前都幫襯過，之後仲一度成為文人雅士嘅聚腳地。
Kelly Chu
更多文章
