Cally - 一田百貨行政總裁成「日本食普及親善大使」｜商界講呢啲

商界講呢啲

Cally

2022-11-04 00:00 HKT

生活專欄

內容

一田百貨一向主打日本新鮮食材，而最近日本農林水產省仲任命咗一田百貨行政總裁黃思麗做「日本食普及親善大使」，表揚一田百貨喺香港多年嚟推動日本食材同飲食文化。儀式之前喺日本國駐香港總領事官邸舉行，由日本國駐香港總領事岡田健一大使親自頒發任命狀。

黃思麗女士話，一田一直推動現代日式生活百貨嘅購物新體驗，優質嘅日本食材係不可或缺，所以好多謝日本當局嘅支持，令到一田可以經常喺日本唔同地方引入優質嘅當造食材，畀大家可以簡簡單單咁歎高質嘅日本鮮肉同蔬果。而被任命做「日本食普及親善大使」之後，會繼續同日本當局同團隊緊密合作，打造多啲新方式推廣日本食材同和食體驗。

話你知，「日本食普及親善大使」係自2015年起由日本農林水產省主辦，以進一步向海外推廣日本食材同飲食文化。一田話佢哋由2008年正式定位做「日式生活百貨」，由日本進口嘅貨品佔整體貨品超過6成，種類有成20,000種，當中由日本空運到港嘅鮮肉同蔬果分別佔3同5成。佢哋每年平均會舉辦好幾個以日本唔同地方做主題嘅推廣企劃，推動日本飲食文化。

除咗積極推廣日本食材之外，黄思麗近年仲大力推動「數碼化」同「可持續發展」概念，引入專業管理領導一田持續發展。喺過去兩年，一田陸續引入客戶關係管理（CRM）等嘅系統，整合顧客數據資料，將顧客嘅消費內容、顧客行為等數據化，方便佢哋了解大家嘅消費情況、公司存貨等，從而提升營運效率。

另外，隨住近年環境、社會及企業管治（ESG）成為市場熱話，唔少企業意識到可持續發展對長遠維持業務穩健嘅重要性。一田都逐步做出改變，例如設立冇包裝嘅蔬果部、賣可持續海鮮、減少用膠袋等等，而唔同產品嘅處理方法都有啲唔同，會循序漸進咁進行。
Cally