Cally - 一田百货行政总裁成「日本食普及亲善大使」｜商界讲呢啲

商界讲呢啲

Cally

2022-11-04 00:00 HKT

阅讀更多

生活专栏

內容

一田百货一向主打日本新鲜食材，而最近日本农林水产省仲任命咗一田百货行政总裁黄思丽做「日本食普及亲善大使」，表扬一田百货喺香港多年嚟推动日本食材同饮食文化。仪式之前喺日本国驻香港总领事官邸举行，由日本国驻香港总领事冈田健一大使亲自颁发任命状。

黄思丽女士话，一田一直推动现代日式生活百货嘅购物新体验，优质嘅日本食材系不可或缺，所以好多谢日本当局嘅支持，令到一田可以经常喺日本唔同地方引入优质嘅当造食材，畀大家可以简简单单咁叹高质嘅日本鲜肉同蔬果。而被任命做「日本食普及亲善大使」之后，会继续同日本当局同团队紧密合作，打造多啲新方式推广日本食材同和食体验。

话你知，「日本食普及亲善大使」系自2015年起由日本农林水产省主办，以进一步向海外推广日本食材同饮食文化。一田话佢哋由2008年正式定位做「日式生活百货」，由日本进口嘅货品占整体货品超过6成，种类有成20,000种，当中由日本空运到港嘅鲜肉同蔬果分别占3同5成。佢哋每年平均会举办好几个以日本唔同地方做主题嘅推广企划，推动日本饮食文化。

除咗积极推广日本食材之外，黄思丽近年仲大力推动「数码化」同「可持续发展」概念，引入专业管理领导一田持续发展。喺过去两年，一田陆续引入客户关系管理（CRM）等嘅系统，整合顾客数据资料，将顾客嘅消费内容、顾客行为等数据化，方便佢哋了解大家嘅消费情况、公司存货等，从而提升营运效率。

另外，随住近年环境、社会及企业管治（ESG）成为市场热话，唔少企业意识到可持续发展对长远维持业务稳健嘅重要性。一田都逐步做出改变，例如设立冇包装嘅蔬果部、卖可持续海鲜、减少用胶袋等等，而唔同产品嘅处理方法都有啲唔同，会循序渐进咁进行。
Cally