Executive日記｜大批市民告別分域碼頭 - KellyChu
KellyChu
2022-02-07 00:00
字體大小
灣仔海傍近日好熱鬧，大批市民湧去分域碼頭(Fenwick Pier），大排長龍，等候入內重遊舊地，影相留念，好多人訂裏面嘅意大利餐廳Gia，歎下最後一次嘅午餐或下午茶，送別呢個曾經華洋共處嘅獨特地方。
分域碼頭位處金鐘與灣仔之間嘅填海區，近中信大廈同分域碼頭街一帶。呢個碼頭由非牟利機構軍人輔導會（Servicemen's Guides Association）擁有及營運，喺第二次世界大戰後，接待過唔少美國同其他國家軍艦嘅到訪同給予補給，大批外國水兵經呢個碼頭進出香港，碼頭為船員提供多元化服務同旅遊指南。
到咗今日，分域碼頭完成咗歷史任務，今天正式關閉，並於本月十一日交還政府，將改建成消防局。由於碼頭紀錄咗香港一段獨特嘅歷史，好多市民近日去緬懷一番，門外大排長龍。Kelly上周六排咗半小時先入到去，見到裝潢好似六十年代咁，好有情懷，而入面商場嘅小店，正在清貨大平賣，好多貨品原本係吸引水兵嘅手信，好似小古玩、中式擺設、珍珠首飾等。小妹同好多人一樣，猛咁影相，留住呢個咁特別嘅歷史空間。
Kelly Chu
更多文章
